Ministri i Jashtëm i Hungarisë Péter Szijjártó tha se njerëzit në vendin e tij “tashmë kanë paguar një çmim jashtëzakonisht të lartë” për luftën në Ukrainë.
Kryeministri hungarez Viktor Orbán dhe qeveria e tij kanë qenë gjithmonë aleati më i ngushtë i Kremlinit brenda bllokut europian, duke çuar në marrëdhënie të vështira diplomatike me presidentin ukrainas Volodymyr Zelensky.
Pasi Moska nisi pushtimin e saj në shkallë të plotë të Ukrainës në shkurt 2022, Orbán ishte lideri më ngurrues i Bashkimit Europian për të vendosur sanksione ndaj Rusisë dhe ka shprehur hapur kundërshtimin ndaj vendeve perëndimore për dërgimin e armëve në Ukrainë.
Komentet e Szijjártó erdhën pasi Zelensky u tha gazetarëve në një intervistë gjatë fundjavës se sjellja e Hungarisë ka qenë “e papërshtatshme”, duke kritikuar shtetin anëtar të NATO-s për përpjekjet e shumta për të bllokuar Ukrainën që të bashkohet me aleancën ushtarake transatlantike.
“Unë besoj se kjo është sjellje e papërshtatshme. Po ju jap mendimin tim subjektiv. Aleati nuk është vetëm një fjalë, është një substancë. Është një bashkim shtetesh me të njëjtin këndvështrim për sigurinë dhe për vlerat.
Ata trajtojnë momente të caktuara. ndryshe, por ka një marrëveshje mes aleatëve, të cilët mbrojnë njëri-tjetrin dhe vlerat e tyre përkatëse”.
Szijjártó tha se hungarezët kanë ofruar “ndihmë të vazhdueshme” për Kievin dhe “kanë pranuar dhe janë kujdesur për më shumë se një milion refugjatë nga Ukraina”, në një postim në Facebook të dielën.
Ai shtoi se “disa hungarezë vdiqën në këtë luftë, anëtarë të komunitetit hungarez në rajonin Transkarpate”.
/abcnews.al
