Loading ...
Policia amerikane ka publikuar videon e ndjekjes në Akron të Ohajos, e cila përfundoi me vdekjen e një 25-vjeçari me ngjyrë.
Ai u godit më shumë se 60 herë nga oficerët të cilët po e ndiqnin.
Policia beson se Jayland Walker, 25 vjeç, hapi zjarr i pari dhe oficerët kishin frikë për jetën e tyre. Ngjarja ka ndodhur më 27 qershor, gjatë natës.
Walker nuk ishte i armatosur kur u largua nga makina e tij, por policia thotë se një pistoletë u gjet më vonë brenda saj.
Kryebashkiaku i Akronit u kërkoi banorëve vendas të tregonin durim pasi ata nisën protestat.
“Videoja është tronditëse,” tha Daniel Horrigan pasi pamjet u publikuan të dielën.
Prokurori i Përgjithshëm i Shtetit Dave Yost premtoi një “hetim të plotë dhe të drejtë” nga Byroja e Hetimit Kriminal të Ohajos, ndërsa policia e Akronit po zhvillon një hetim të brendshëm të veçantë nëse oficerët kanë shkelur rregullat apo politikat e departamentit.
Një avokat i familjes së Walker tha se oficerët kishin vazhduar të qëllonin edhe pasi ai ishte në tokë.
Makina e Jayland Walker u ndal të hënën e 27 qershorit në orën 00:30 për një kontroll rutinë.
Një e shtënë u dëgjua nga makina dhe një kamera e trafikut filmoi atë që dukej të ishte një blic i grykës, tha shefi i policisë së Akron, Steve Mylett, cituar nga agjencia e lajmeve Associated Press.
Kamerat e trupit të policisë tregojnë një person duke dalë nga makina dhe duke vrapuar drejt një parkingu, i ndjekur nga oficerët për rreth 10 sekonda përpara se të hapin zjarr.
Një oficer u përpoq fillimisht të përdorte një armë paralizuese, por kjo ishte e pasuksesshme, thotë policia./Abcnews.al/
