Arrestimi i Nuredin Dumanit, personit të shumëkërkuar mbi të cilin rëndon akuza për 7 vrasje, ishte kryelajmi i ditës së Martë.
Arrestimi i Dumanit u bë në një apartament në Fier, disa orë pasi ishte plagosur në Papër të Elbasanit gjatë një shkëmbimi zjarri.
Arrestimi i Dumanit erdhi pas një telefonate të mbërritur në numrin pa pagesë të Policisë së Shtetit, ku u dha vendndodhja e saktë e tij.
Abc ka publikuar edhe foton e parë që i është bërë Dumanit sapo policia ka hyrë në dhomë. Siç shihet dhe në foto, Dumani ka qenë i veshur me një ‘T-shirt’ dhe me mbathje i vendosur mbi krevat.
Ndërkohë ajo që vihet re është edhe ndryshimi i lukut, pasi Dumani ka rritur flokët, ndryshe nga foto që kishte publikuar Policia e Shtetit kur e kishte shpallur person në kërkim.
Kujtojmë që bashkë me Dumanin mbrëmjen e së martës u bë dhe arrestimi i Hajredin Hoxhës, i cili është dhe personi që dyshohet se largoi Dumanin nga vendngjarja pas përplasjes me armë në Papër të Elbasanit.
Gjithashtu në komisariat u shoqërua edhe një grua e cila është me origjinë nga Kosova. /Abcnews.al/
