Loading ...
Ish-presidenti i vendit, Ilir Meta, i shoqëruar nga forcat e policisë, mbërriti pranë banesës së familjes, për t’i dhënë lamtumirën babait të tij, Rexhep Meta.
I arrestuar që prej 21 tetorit 2024, kreu i Partisë së Lirisë të martën la qelinë dhe udhëtoi drejt Skraparit, fshatit Çepan, aty ku i ati kishte lënë amanet të prehet.
Edhe pse të divorcuar, në fshatin Çepan, aty ku Rexhep Metës iu dha lamtumira e fundit, ishte e pranishme edhe Monika Kryemadhi.
Gjatë ceremonisë mortore, Ilir Meta mbajti edhe një fjalim për babain e tij mes familjarëve e miqve të ngushtë, ku u pa i përlotur.
SPAK dhe Drejtoria e Burgjeve miratuan lejen që Meta të dilte nga qelia për t’i dhënë lamtumirën e fundit babait të tij.
Pas përcjelljes për në banesën e fundit të babait të tij, Ilir Meta do të ketë edhe pak orë në dispozicion për të takuar miq e familjarë përpara se të rikthehet sërish në qeli në Burgun 313 në Tiranë.
Ndërkohë, sipas informacioneve, kreu i Partisë së Lirisë, Ilir Meta, do të ketë mundësi të dalë sërish nga qelia edhe më 3 qershor për të bërë pritjen e miqve e familjarëve në Tiranë për disa orë e më pas do të rikthehet sërish në qeli.
