Loading ...
Dhjetëra milionë evropianë po përballen me temperatura ekstreme ndërsa një valë e re e të nxehtit ka përfshirë pjesë të mëdha të kontinentit, nga Spanja deri në Mbretërinë e Bashkuar, me meteorologët që paralajmërojnë se kushtet do të përkeqësohen gjatë fundjavës, veçanërisht në Francë.
Kjo është vala e dytë e të nxehtit që prek Evropën Perëndimore në më pak se një muaj, duke detyruar autoritetet të rrisin nivelet e alarmit në disa vende, përfshirë Britaninë e Madhe, Francën, Zvicrën, Gjermaninë dhe Spanjën.
Shërbimi meteorologjik francez, Météo-France, njoftoi se shumë rajone të vendit janë vendosur në alarm të kuq, niveli më i lartë i paralajmërimit, për ditën e diel.
Sipas ekspertëve, episodi aktual mund të krahasohet me valën historike të të nxehtit të gushtit 2003, e cila shkaktoi mijëra viktima në të gjithë Evropën.
Ekspertët e klimës paralajmërojnë se valët e të nxehtit po bëhen më të shpeshta, më intensive dhe më të gjata si pasojë e ndryshimeve klimatike. Temperaturat e larta vlerësohet se kanë shkaktuar mbi 60 mijë vdekje në Evropë gjatë viteve 2023 dhe 2024, sipas studimeve të publikuara në revistën shkencore Nature Medicine.
Ndërkohë, të dhënat e përmbledhura nga ‘The Lancet’ tregojnë se pothuajse të gjitha rajonet evropiane kanë regjistruar rritje të vdekshmërisë së lidhur me nxehtësinë gjatë periudhës 2015–2024 krahasuar me vitet 1991–2000. Mesatarisht, kjo përkthehet në 52 vdekje shtesë për çdo një milion banorë në vit.
/abcnews.al/
