Loading ...
Shtëpia e Bardhë i ka dalë në mbrojtje sekretares së sapoemëruar të shtypit, Katie Zacharia, mes pikëpyetjeve lidhur me kualifikimet e saj ligjore. Presidenti i SHBA, Donald Trump e prezantoi Zacharian si avokate kur njoftoi emërimin e saj javën e kaluar, ndërsa edhe ajo vetë e ka përshkruar veten si juriste.
Megjithatë, kur një gazetar e pyeti të martën se në cilin shtet e kishte kaluar provimin e licencimit për ushtrimin e profesionit të avokatit, Zacharia, e cila qëndronte pranë presidentit, u përgjigj: “Kur u shpërngula në Kinë”.
Zacharia nuk rezulton e regjistruar në asnjë nga odat e avokatëve të shteteve ku ka jetuar. Drejtori i komunikimit i Shtëpisë së Bardhë, Steven Cheung mbrojti emërimin e saj, duke e cilësuar si “unike për nga kualifikimet dhe jashtëzakonisht të zgjuar për të ndihmuar në informimin e popullit amerikan”.
Duke iu përgjigjur pyetjeve lidhur me kualifikimet e saj ligjore, Zacharia tha në një deklaratë këtë javë: “Kam ushtruar të drejtën ndërkombëtare të transaksioneve, me të gjitha kualifikimet e duhura”.
Të mërkurën, organizata mbikëqyrëse “Campaign for Accountability” paraqiti një ankesë pranë Odës së Avokatëve të Kalifornisë, duke kërkuar hetim lidhur me atë nëse Zacharia “është paraqitur vazhdimisht para publikut si person i autorizuar për të ushtruar profesionin e avokatit pa licencë, veprim që legjislacioni i Kalifornisë e konsideron vepër penale”.
Zacharia, 42 vjeçe, u diplomua në fakultetin juridik të Universitetit Pepperdine në vitin 2011, por nuk e kaloi provimin e licencimit për ushtrimin e profesionit të avokatit në Kaliforni, sipas gazetës “The Wall Street Journal”. Ajo i tha gazetës “The New York Times” se rektori i universitetit e kishte këshilluar se mund ta quante veten juriste, por jo avokate. Vetëm diploma në drejtësi nuk i jep një personi të drejtën për të ushtruar profesionin e avokatit në SHBA.
Një person me njohuri të drejtpërdrejta për çështjen i ka thënë gazetës se Zacharia e kishte dhënë provimin rreth kohës kur po planifikonte dasmën dhe përgatitej të shpërngulej në Kinë me bashkëshortin e saj të ardhshëm.
Në Kinë, vetëm shtetasit kinezë mund të marrin licenca për ushtrimin e profesionit të avokatit, ndërsa punonjësit e huaj mund të punojnë në firmat ligjore në role të tjera.
