Loading ...
Presidenti i Shteteve të Bashkuara, Donald Trump, ka shprehur optimizëm për mundësinë e arritjes së një marrëveshjeje paqeje mes Rusisë dhe Ukrainës, duke deklaruar se beson se të dyja palët janë të gatshme t’i japin fund luftës.
Duke folur në Ankara, ku po zhvillohet samiti i NATO-s, Trump tha se kishte zhvilluar një “bisedë shumë të mirë” me presidentin rus, Vladimir Putin, ndërsa kishte komunikuar edhe me presidentin ukrainas, Volodymyr Zelensky.
“Besoj se të dy duan të arrijnë një marrëveshje. Është për të ardhur keq që u desh kaq shumë kohë, por mendoj se do të ketë një rezultat,” u shpreh Trump.
Ai shtoi se si Putini ashtu edhe Zelensky “duan ta zgjidhin këtë tani” dhe shprehu bindjen se një marrëveshje mund të arrihet në një të ardhme të afërt.
I pyetur nëse kishte ndonjë zhvillim të ri që e bënte më optimist ose nëse Rusia ishte e gatshme të bënte lëshime, Trump u përgjigj shkurt: “Asgjë nuk ka ndryshuar.”
Presidenti amerikan theksoi se shqetësimi i tij kryesor është ndalimi i viktimave që po shkakton lufta.
“Unë thjesht nuk dua që njerëzit të vazhdojnë të vriten,” deklaroi ai, duke shtuar se konflikti prek më shumë Evropën sesa Shtetet e Bashkuara.
“Ne jemi aty për të ndihmuar Evropën, por ky konflikt nuk prek drejtpërdrejt SHBA-në. Megjithatë, nuk mund ta duroj të shoh atë që po ndodh,” tha Trump.
Ai tregoi se ka parë fotografi nga fushëbetejat në Ukrainë, duke i përshkruar ato si skena të një dhune ekstreme.
“Nuk kam parë kurrë diçka të tillë. Është një masakër dhe duhet të marrë fund,” përfundoi presidenti amerikan.
