Kategoria Superiore ka nisur pushimet, pas mbylljes së sezonit që dha edhe verdiktet tij.
Por ky diskutim vlen për lojtarët, pasi në klube puna vazhdon për përgatitjen e edicionit të ardhshëm, që për skuadrat pjesmarrëse në Kupat e Europës nis më shpejt.
Egnatia do të luajë në raundin e parë eliminator të Champions, ndërsa Vllaznia, Dinamo City dhe Partizani do të përfaqësojnë futbollin shqiptar në raundin e parë kualifikues në Konference League.
Mes këtyre katër ekipeve, punën më të lehtë duket se e kanë kampionët e Superiores.
Gjatë sezonit, Egnatia tregoi se ishte skuadra më e kompletuar. Gjithsesi në klubin rrogozhinas duhet të merren më së shumti me rinovimin e disa prej lojtarëve të rëndësishëm. Nuk do të mungojnë përforcimet dhe i pari do të jetë në sulm. Kastriot Selmani do të bashkohet me Egnatian, pasi u shpall kampion i Kosovës me Dritën.
Më të impenjuara do të jenë tre skuadrat e tjera.
Vllaznia nuk humbi kohë, duke zyrtarizuar Edi Martinin si trajnerin e ri, por finalja e Kategorisë Superiore I konfirmoi drejtuesëve shkodranë se ekipi ka nevojë serioze për t’u përforcuar për Kupat e Europës.
I njëti diskutim vlen për Dinamo City dhe Partizani.
Dy klubet e kryeqytetit kanë në qendër të projektit dy trajnerët Skënder Gega e Ilir Daja.
Por që të dy teknikët kanë nevojë të plotësojnë skuadrat e tyre për të qenë gati në korrik, kur do të nisin edhe kualifikueset e Conference League.
