Lezha po përjeton një sezon turistik me ritme pozitive, ku numri i vizitorëve është rritur ndjeshëm krahasuar me vitet e mëparshme. Drejtori i Turizmit në Bashkinë Lezhë, Renaldo Xhani, thotë se kjo rritje është falë promovimit të zonës, përmirësimit të shërbimeve dhe aktiviteteve të shumta që ofron qyteti.
Sipas tij, pjesa më e madhe e pushuesve vijnë nga Kosova, por ka edhe një rritje të turistëve nga Gjermania dhe Polonia. Një nga arsyet kryesore që zgjedhin Lezhën mbeten çmimet e arsyeshme.
Xhani thekson se po rritet edhe numri i ditëve të qëndrimit.
Shëngjini mbetet destinacioni më i frekuentuar, së bashku me Ranën e Hedhun.
Ndërkohë, investimet në bypass-in e Shëngjinit pritet të lehtësojnë trafikun në aksin drejt Velipojës dhe të krijojnë kushte më të mira për zhvillimin e turizmit në gjithë zonën bregdetare të Lezhës.
