Loading ...Më shumë se 300 metra katrorë janë ambientet e palestrës së rikonstruktuar në dispozicion të mundjes në Kukës.
Për sportistët e rinj, ambientet e reja janë shtysë për të vijuar këtë traditë të hershme të Kukësit.
Ish mundës e ish trajnerë të këtij sporti, u bënë bashkë në ditën përuruese të palestrës, e duke e krahasuar me sakrificat e dikurshme, thonë se me këto kushte, ky sport duhet të jetë elitë kombëtare.
Për herë të parë në këtë palestër, por edhe në Kukës, ishin edhe mundësit e kombëtares, Islam Dudaev e Zelimkan Abakarov. Të dy mundësit olimpikë dhanë vlerësimët e tyre për mundjen kuksiane.
“Kjo është hera e parë në Kukës për mua. Marshallah, më vjen mirë të shoh kaq ambiente sportive ku trajnohen të rinjtë. Jam I lumtur sidomos kur shoh fëmijë që kanë dëshirë të angazhohen në mundje.”
“Që kur kam ardhur në Shqipëri jam njohur me traditën e mundjes dhe mundësit me emër që ka nxjerrë Kukësi. Këto ambiente moderne dhe kaq shumë të rinj që merren me mundje, tregojnë se vijueshmëria e kësaj tradite do vijojë ndër breza.”
Presidenti I Federatës shqiptare të mundjes Seit Prizreni thotë se falë këtyre ambienteve, brezave të rinj të mundjes kuksiane po I jepen mundësi të shumta.
Në ceremoni u kujtuan edhe ish kampionë dhe trajnerë të këtij sporti që kanë kontribuar, duke ndarë edhe mirënjohje për ta.
Ky investim është pjesë e bashkëpunimit të Federatës shqiptare të futbollit dhe kontribues të tjerë që I dhanë pamje tërësisht të re kësaj palestre.
