Policia e Vlorës ka dhënë detaje për aksidentin e rëndë të ndodhur paraditen e sotme në bypasin Orikum-Kaninë. Viktimat janë dy të rinj, të cilët punonin në ndërtimin e këtij aksi.
Uniformat blu bëjnë me dije se kanë ndërruar jetë drejtuesi i kamionit shtetasi Armand Beu, 32 vjeç, banues në Kavajë dhe pasagjeri në kamion shtetasi Klajdi Kaja, 28 vjeç, banues në Lushnje.
Siç abcnews.al ka raportuar më herët, shkak i aksidentit tragjik me dy viktima dyshohet të ketë qenë shpejtësia. Drejtuesi i kamionit së bashku me pasagjerin kishin ngarkuar kamionin me zhavor dhe ishin duke zbritur nga zona e Kaninës për në Orikum.
Nuk dihet nëse ka pësuar defekt apo nuk kanë funksionuar frenat, por drejtuesi i automjetit i cili nga frika se mos dilte nga rruga dhe binte poshtë në humnere është kthyer në mes të rrugës dhe është përplasur me anën e shkëmbit.
Përplasja ka qenë shumë e fortë sa të dy trupat kanë dalë nga xhami i kamionit, dhe ngarkesa me zhavor i ka mbuluar të dy trupat. Ndërkohë, pas disa orësh është nxjerrë edhe trupi i dytë, i cili ishte i mbuluar me inerte.
Njoftimi i policisë:
Vlorë/Informacion shtesë
Në lidhje me informacionin paraprak të dhënë më parë, ku në bypasin Orikum-Kaninë, është rrëzuar një kamion, sqarojmë se kanë ndërruar jetë drejtuesi i kamionit shtetasi A. B., 32 vjeç,banues në Kavajë dhe pasagjeri në kamion shtetasi K. K., 28 vjeç, banues në Lushnje.
Grupi hetimor ndodhet në vendngjarje dhe po punon për zbardhjen e plotë të rrethanave të ngjarjes.
g.v/abcnews.al
