Loading ...Një ndërhyrje e rrallë kirurgjikale në Qendrën Spitalore Universitare “Nënë Tereza” ka rikthyer shpresën për një pacient 70-vjeçar. Një tumor gjigant, i cili kishte qëndruar për një kohë të gjatë në hundën e tij, u hoq me sukses nga ekipi i shërbimit të ORL-së. Përmasat e tij ishin të pazakonta: 3.1 kilogramë peshë, 30 centimetra gjatësi dhe 50 centimetra perimetër.
Një rast kompleks, që kërkoi përkushtimin dhe bashkëpunimin e një ekipi të specializuar mjekësor. Nën drejtimin e shefes së shërbimit, Prof. Dr. Birkena Qirjazi, në ndërhyrje u angazhuan Dr. Tedi Minarolli, Dr. Kristi Tata dhe Dr. Arli Kokomani. Kirurgu ORL, Dr. Tedi Minarolli, rrëfen në “ABC e Mëngjesit” detajet e kësaj ndërhyrjeje të pazakontë. Ai tregon se kishte trajtuar edhe më parë raste të ngjashme, por asnjë me përmasa të tilla.
Pacienti kishte vuajtur për një kohë të gjatë, ndërsa arsyeja se si e kishte përballuar këtë gjendje mbetet e vështirë për t’u kuptuar. Historia e tij bëhet edhe më e ndërlikuar për shkak të rrethanave personale. Sipas mjekut, pacienti ishte paraqitur më herët në spital, por kishte refuzuar trajtimin. Ai kishte qenë i burgosur dhe, për arsye që mund të bëhen publike më vonë, nuk kishte marrë më parë kujdesin e nevojshëm.
Kur mbërriti në QSUT, fillimisht iu nënshtrua trajtimit për rreth dy javë. Më pas, ekipi mjekësor vlerësoi se ndërhyrja kirurgjikale ishte e domosdoshme. Operacioni zgjati disa orë dhe u përmbyll me sukses, duke i hequr pacientit një barrë të rëndë fizike dhe shëndetësore. Pas ndërhyrjes, ai pritet të marrë frymë më lirshëm dhe të ketë një përmirësim të ndjeshëm të cilësisë së jetës.
Por ky nuk është i vetmi rast i veçantë në përvojën e Dr. Tedi Minarollit. Nga formacionet e vogla në hundë deri te tumoret e përmasave të pazakonta, mjeku rrëfen rastet që sfidojnë kirurgjinë ORL. Sa të shpeshta janë tumoret në hundë dhe cilat janë shenjat që nuk duhen neglizhuar? Një histori që dëshmon se pas çdo ndërhyrjeje të suksesshme qëndron një ekip mjekësor, profesionalizëm dhe një mundësi e re për jetën./abcnews.al
