Loading ...
Gjenerali Dedë Prenga ka folur për zhvillimet e sigurisë globale dhe sfidat me të cilat përballet rendi ndërkombëtar, gjatë një interviste në emisionin “War Report” në ABC News.
Ai u shpreh se ndryshimet e fundit në dinamikat e sigurisë kanë bërë të domosdoshme reagimin e aleancave ndërkombëtare, veçanërisht në raport me kërcënimet potenciale dhe veprimet e mundshme të Rusisë.
“Ndryshimet në zhvillimin e sigurisë globale kanë bërë të domosdoshme reagimin e aleancave që janë për t’ju përgjigjur situatës në raport me veprimet që mund të marrë Rusia”, tha Prenga.
Sipas tij, në të ardhmen mund të diskutohen edhe zhvendosje të kapaciteteve reale bërthamore në territorin evropian, një çështje që pritet të qartësohet në takimet e ardhshme ndërkombëtare mbi sigurinë.
“Marrja e vendimit për të dislokuar përgjithësisht në Evropë kapacitete reale bërthamore, këtë do ta konfirmojë takimi i ardhshëm për të treguar se çfarë ka ndryshuar realisht sa i përket niveleve të zhvendosjeve”, u shpreh ai.
Gjenerali theksoi gjithashtu nevojën për bashkëpunim më të ngushtë mes fuqive kryesore evropiane si Mbretëria e Bashkuar, Franca dhe Gjermania, duke nënvizuar rëndësinë e një qasjeje të koordinuar strategjike.
“Mbretëria e Bashkuar, Franca dhe Gjermania duhet të kenë bashkëpunim. Duhet të jetë një plan i menduar mirë, besoj që me kalimin e kohës do të gjendet gjuha politike”, deklaroi Prenga.
