pazare
ad min13:15 | 12/09/2019
Deputeti demokrat Myslim Murrizi ka akuzuar mazhorancën socialiste se po vazhdon të bëjë pazare me opozitën jashtë parlamentit për ta rindërtuar sistemin zgjedhor në avanzhin e tyre. Por, kreu i grupit parlamentar socialist Taulant Balla tha se ndryshimet në reformën zgjedhore kërkojnë bashkëpunimin e të gjithë faktorëve të politikës.
“Edhe Taulantin edhe Ramën i shoh që thonë ia kemi shtrirë dorën këtyre që vijnë rrotull institucioneve një herë në muaj se kur do t’ia shijojnë erën nga brenda. A keni shtrirë dorë bashkëpunimi apo dorë mashtrimi se kurrë nuk keni bërë marrëveshje veç pazare në kurriz të qytetarëve shqiptarë. A keni shtrirë dorë apo traste, tendera, thes. Edhe falja e 61 bashkive në 31 Qershor nuk besoj se ishte ndonjë kaos politik i shqiptarëve që jetojnë këtu. Ishte pazar me trastë pas dore”, tha Murrizi.
“Zoti Murrizi ne ua kemi thënë me kolegët tuaj të partisë nga e cila vini kemi pasur veçse një çështje kusht për reformën zgjedhore. Votën e qytetarëve që jetojnë jashtë territorit. Nuk ka PS kushte për reformën zgjedhore. Padyshim historikisht teksa janë bërë reforma zgjedhore në këtë vend është punuar në mënyrë koherente me opozitën parlamentare, por edhe opozitën jo parlamentare. Sepse nëse i referoheni frymës së Kushtetutës por edhe Kodit Zgjedhor të Republikës së Shqipërisë merren për bazë rezultatet e zgjedhjeve të fundit. Në rezultatet e zgjedhjeve të fundit, PD, LSI janë parti që rezultojnë të jenë parti parlamentare. Për këtë arsye harroje se kam dashuri për Lulzim Bashën. Gjëja e fundit që mund të më akuzosh kjo është”, tha Balla./abcnews.al
ad min12:46 | 07/04/2019
Por, kryetari i Partisë Demokratike duket i vendosur për të vijuar me aksionin opozitar, deri në rrëzimin e qeverisë “Rama”. Nga Rrogozhina, Lulzim Basha iu përgjigj presidentit se nuk do të ketë as kompromis dhe as pazare, ndërsa bëri thirrje për bashkim forcash në protestën e 13 Prillit.
Për Lulzim Bashën nuk ka kthim pas. Kryetari i Partisë Demokratike iu përgjigj Presidentit të Republikës nga Rrogozhina ku tha se nuk do të ketë kompromis për të zhbërë atë që nisi me 16 Shkurt.
“Nuk ka dhe nuk do të ketë Pazar mbi sakrificën tuaj. Nuk ka dhe nuk do të ketë asnjë zgjidhje tjetër përveç një zgjidhje të thellë politike që do të bëjë të mundur që ëndrra e çdo të riu dhe të reje të Rrogozhinës, e çdo prindi, ëndrra e fermerëve për një Shqipëri evropiane të bërë realitet”, tha Basha.
Protesta e ardhshme e madhe e opozitës paralajmëroi kryedemokrati do të jetë më 13 Prill. Basha ftoi qytetarët të bëhen pjesë e tubimit që do të zhvillohet në Tiranë i cili ndryshe nga herët e tjera të shtunën e ardhshme do të mbahet gjatë pasdites.
“Të bëheni pjesë e lumit të qytetarëve që do derdhen në Tiranë mbrëmjen e shtunës së ardhshme në orën 18:00 në një tjetër bashkim të madh kombëtar. Pranvera sapo ka nisur, ndryshimi po vjen falë jush”, tha Basha.
Gjithashtu kryetari i Partisë Demokratike foli dhe për ndryshim ë sistemit zgjedhor.
“Deputetët e ardhshëm në parlament nuk do të përcaktohen më në mënyrë misterioze, anonime apo vetëm nga një njeri. Deputetët do të jenë prodhim i vullnetit të qytetarëve. Ata do ta kenë fatin e lidhur me qytetarët. Ata do ta kenë fatin të lidhur me ju. Ju do të jeni ata që do të përcaktoni kandidatët e ardhshëm të PD-së, ju do të jeni ata që do përcaktoni me votë, deputetët e ardhshëm të parlamentit”, tha kryedemokrati.
Beteja e demokratëve tha kryetari Lulzim Basha ka në thelb varrosjen e fenomenit Rama, politikanit që sipas tij fut duart në xhepat e qytetarëve për të pasuruar një grup njerëzish. Lideri i opozitës pati dhe një paralajmërim për ata të cilët i quan oligarkë, ndërsa tha se do t’u konfiskohet çdo pasuri që po u zhvasin popullit./abcnews.al
ent ela20:56 | 12/03/2019
Ish-deputeti i PD-së Gazmend Bardhi ka rrëfyer detaje rreth asaj se çfarë përmban dosja 184, për të cilën opozita pretendon se janë të tjera përgjime sikundër edhe në dosjen 339, ku drejtues të lartë të PS-së janë të përfshirë direkt në shitblerjen e votës. Por deklarata e bërë nga demokrati këtë herë ka qenë shumë e fortë duke u shprehur se në dosjen 184 është vetë Edi Rama, i cili është kapur në përgjime duke folur me elementë të inkriminuar, të cilët bëjnë pazare me votën e shqiptarëve.
Mirela Milori: Ndalemi pak tek dosja 184. Keni të dhëna se kush është në këtë dosje i kapur?
Gazmend Bardhi: Duke filluar nga Kryeministri i vendit Edi Rama tek ministra të qeverisë së tij dhe tek drejtues lokalë të PS-së, tek drejtues të Policisë së Shtetit. Sepse ky është një problem shumë i madh i përfshirjes së Policisë së Shtetit si një bandë në favor të një partie politike ndërkohë që policia duhet të garantonte zgjedhje të lira dhe të ndershme. Pra një numër i konsiderueshëm funksionarësh publikë.
Mirela Milori: Pra Rama, Kryeministri është i përmendur nga të tretë apo është vetë i rënë në përgjim?
Gazmend Bardhi: Unë mendoj se sa kohë unë nuk kam me vete një dokument që mund tua provoj
Mirela Milori: Ju lutem ju po përmendi emrin e Kryeministrit të vendit…
Gazmend Bardhi: Edhe Kryeministri e di vetë që është aty. Nuk e ka mohuar asnjëherë.
Mirela Milori: Ju lutem ne duhet të jemi seriozë, Kryeministri i vendit sipas jush…
Gazmend Bardhi: Është i kapur në përgjime duke bërë pazare me votën e shqiptarëve.
Mirela Milori: Edhe një herë Kryeministri është i përgjuar në telefon apo është në bisedë mes të tretëve që e përmendin Kryeministrin.
Gazmend Bardhi: Kryeministri është i përgjuar dhe po të hapësh dosjen në Prokurori Kryeministrin mund ta gjen në më shumë se 5 apo 6 procedime penale.
Mirela Milori: Që flet vetë në telefon?
Gazmend Bardhi: Absolutisht po.
Mirela Milori: Me njerëz të përfshirë në shitblerjen e votës…
Gazmend Bardhi: Me njerëz të inkriminuar dhe të përfshirë në fenomenin e shitblerjes së votës. Nga Edi Rama tek ministra dhe ish-ministra të rëndësishëm deri dje dhe tek drejtues të lartë të PS-së. Prandaj Edi Rama e ke patur dhe ne kemi thënë që në fillim, jetike kapjen e organit të Prokurorisë.
ad min14:47 | 13/07/2018
Partia Demokratike ka akuzuar ministren e Arsimit, Lindita Nikolla, për dështim në pajisjen e nxënësve me dëftesa shkollore për shkak të prishjes së pazareve për tenderin përkatës. Ankesat, sipas deputetit demokrat Luçiano Boçi, kanë ardhur nga vetë nxënësit dhe prindërit të cilët kanë mbetur peng, sipas tij, të një procedure që duhet të kishte përfunduar dy muaj më parë.
“Pranë Partisë Demokratike dhe Komisionit të Edukimit dhe Mediave, kanë ardhur ankesa nga prindër të cilët ngrenë shqetësimin se fëmijët e tyre nuk mund të pajisen dot me dëftesat e arsimit parauniversitar. Të vetmet dëftesa që u printuan dhe u shpërndanë ishin ato të klasës së 9-të, por edhe ato rezultuan me gabime, çka e bën dëftesën dokument të pavlefshëm për 35 mijë nxënës. Një pjesë prej tyre rrezikojnë të mos regjistrohen në shkollë të mesme brenda dhe jashtë vendit.
Partia Demokratike dënon heshtjen e Ministrisë së Arsimit!
Papërgjegjshmëria, paaftësia dhe korrupsioni i Ministres Lindita Nikolla ka shënuar një rekord të ri – rreth 420 mijë nxënës shqiptarë për herë të parë në historinë e shkollës shqipe janë pa dëftesat shkollore. Sipas informacioneve të ardhura në Partinë Demokratike tenderi i dëftesave është zvarritur për shkak të pazareve të prishura të Ministres së Arsimit”.
/abcnews.al
ad min17:02 | 15/04/2018
Mediat greke kanë ndezuar një debat të brendshëm sa i përket zgjidhjes së çështjes së emrit të Maqedonisë. “Ta Nea” në një artikull shkruan se qeveria e Athinës po bën pazare për këtë çështje me Gjermaninë.
Ndërsa zgjidhja e çështjes së emrit të Maqedonisë ka hyrë në fazën finale, mediat greke raportojnë për pazare të Greqisë me Gjermaninë. Nëse arrihet marrëveshje për emrin, masa për shkurtimin e pensioneve do të anulohej për 6 muaj, si “dhuratë” gjermane për Greqinë. Për premtimin e këtillë të Berlinit për Athinën shkruan gazeta greke “Ta Nea”, duke analizuar se çfarë do të fitonte me këtë Greqia. Gazeta shkruan se kjo masë anti-krizë tashmë është votuar dhe se duhet të hyjë në fuqi nga 1 Janari i vitit të ardhshëm. Anulimi 6 mujor do t’i përshtatej kryeministrit grek, Aleksis Tsipras dhe planeve të tij zgjedhore.
Këto raportime kanë shkaktuar reagime të shumta. Opozita ka akuzuar qeverinë greke se është duke zhvilluar bisedime të fshehta. Ndërsa nga kabineti i Tsiprasit thonë se “Shkrimet mizore të përditshme nëpër media” janë të panevojshme për komentim. Nga ana tjetër në Maqedoni koordinatori nacional për në NATO-n, Stevo Pendarovski deklaroi se disa nga propozimet e deritanishme të palës greke për zgjidhjen e kontestit nuk kanë qenë aspak reale. Duke aluduar në identitetin, Pendarovski në intervistën për Radion Evropa e Lirë shtoi se në shekullin 21 është ofenduese të flitet për disa tema.
Ndërkohë, më herët kryeministri Zoran Zaev konfirmoi se në bisedimet me Greqinë ka mbetur ende e hapur përmbajtja dhe përdorimi i emrit të ri. Shefi i qeverisë përsëriti se është optimist për mbyllje të shpejtë të kësaj çështje pasi ka përparim në tema si identiteti, shtetësia dhe gjuha./abcnews.al
ent ela15:15 | 30/01/2018
Policia e Tiranës ka shpallur në kërkim një person në lidhje me ekzekutimin e 42-vjeçarit, Devi Kasmi. I dyshuar është Domart Konjari, të cilin Kasmi ka tentuar ta vrasë në Spanjë, vend nga i cili kishte pak kohë që ishte kthyer.
Ekzekutimi mafioz i Devi Kasmit në Tiranë mbrëmjen e së hënës ka rikthyer edhe një here në qendër të vemëndjes historitë e vjetra të përplasjeve mes grupeve kriminale në kryeqytet.
Policia edhe pse jo zyrtarisht, pohon se atentati mund të ketë ndodhur për shkak të trafikut të drogës jashtë territorit Shqiptar, konkretisht në Spanjë e Francë.
Defrim Kasmi ose Devi Kasmi ka qenë një personazh i njohur për policinë e Tiranës. Ai ishte hetuar për disa atentate të bujshme të ndodhur në kryeqytet disa vite më parë. Një ndër to ishte edhe ekzekutimi i Franc Konomit në vitin 2010, në vijim të përplasjeve të bandave të rrugës “Bardhyl” në kryeqytet. 42-vjeçari ndërkohë rezulton i dënuar nga Gjykata për falsifikim pasaporte.
Dyshimet e uniformave blu janë se 42-vjeçari kishte pak kohë që ishte kthyer nga Spanja, ndërsa mësohet se atje ka tentuar të vrasë Domart Konjarin. Emir i këtij të fundit ka çuar në dyshimin e policisë që mund të ketë qenë Konjari porositësi i vrasjes së Kasmit. Konjari vijon të jetë në arrati prej vitit 2016, ku është dënuar me 10 vite burg nga drejtësia Franceze lidhur me trafikun e kokainës në Marsejë.
Fakti që iu gjetën 3 kilogram kokainë në banesën e Devi Kasmit përforcon edhe më shumë pistën e uniformave blu se, viktima ishte i lidhur me shpërndarjen e drograve të forta si në Shqipëri e po, kështu edhe në Spanjë e Francë.
Deri më tani 7 persona u shoqëruan në komisariatin e policisë së Tiranës, të cilët pasi dhanë deklrarimet e tyre u lane të lire. Ndërsa janë sekuestruar edhe kamerat e sigurisë nga ekspertët e krimeve të rënda për të zbuluar më shumë të dhëna që mund ti çojnë ekspertët drejt zbulimit të autorëve të mundshëm. /abcnews.al
ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.
NUIS/NIPT K01711004FKontaktTelefono
