Loading ...Dhjetëra qytetarë dhe përfaqësues të sindikatave dolën në protestë këtë 1 Maj në Tiranë.
Ata u mblodhën në disa pika të kryeqytetit, para Ministrisë së Ekonomisë dhe para Kryeministrisë. Kërkesat ishin të njëjta, zbatimi i Kodit të Punës.
“1 Maj nuk është thjeshtë një simbol, por thirrje për drejtësi e barazi. Është thirrje për të drejta në punë dinjitoze. Është rritur numri i vdekjeve në vendin e punës me 45% krahasuar me një vit më parë. Është dyfishuar numri i aksidenteve në punë”.
“Është koha për të kërkuar të drejtat e shumta, por të mohuara”.
Protestuesit kërkojnë më shumë të drejta dhe kushte më të sigurta në punë, ndërsa në fokus ishte edhe statusi i minatorit dhe minimumi jetik.
“Janë rreth 30 pika të dërguara Këshillimit të Ministrave, kërkohet statusi i minatorit, minimumi jetik, paga dinjitoze, tha një protestues.
“Shoh dhjetëra minator që kanë punuar vite nëntokë, ne kërkojmë statusin e minatorit”, u shpreh ai.
Megjithatë, jo të gjithë e panë këtë ditë si protestë. Shumë qytetarë zgjodhën të kalojnë kohën në Parkun e Liqenit Artificial.
“Duhet të jetë protestë, por, në Shqipëri asnjëherë nuk është protestuar. Është ende si në monizëm, njerëzit festojnë”, u shpreh një qytetar.
“Kemi dal si familje, për ne është festë, për të tjerët se di ça mendojnë”, tha një tjetër.
“Kemi dal se është koha e mirë, ditë pushimi. Të kënaqur me vendin e punës, punë komode dhe të mirëpaguar”.
Në mbarë botën, kjo ditë shënohet me protesta për të drejtat e punëtorëve.
