Loading ...
Partia Demokratike e Kosovës ka reaguar pas aktgjykimit të Dhomave të Specializuara të Kosovës në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit.
Në një komunikatë, PDK ka shprehur indinjatë, zhgënjim dhe kundërshtim ndaj vendimit, duke e cilësuar atë si të padrejtë.
Sipas PDK-së, aktgjykimi mbështetet në pretendime dhe materiale që partia i konsideron të fabrikuara dhe të lidhura me propagandën e Serbisë për kriminalizimin e luftës së UÇK-së.
“Për ne, ky aktgjykim është një padrejtësi e madhe, sepse mbështetet në pretendime e materiale që i konsiderojmë të fabrikuara dhe të ushqyera ndër vite nga aparati shtetëror dhe propaganda e Serbisë për ta kriminalizuar luftën e drejtë të Ushtrisë Çlirimtare të Kosovës”, thuhet në komunikatë.
PDK ka deklaruar se aktgjykimi nuk mund, sipas saj, ta ndryshojë atë që partia e konsideron si të vërtetën historike për luftën në Kosovë.
“Kjo të vërtetë nuk mund ta ndryshojë asnjë aktgjykim”, thuhet në reagim.
Partia ka theksuar gjithashtu se Hashim Thaçi, Kadri Veseli, Jakup Krasniqi dhe Rexhep Selimi, sipas saj, iu përgjigjën vullnetarisht procesit gjyqësor në Hagë, me besimin se e vërteta do të triumfonte.
PDK e ka cilësuar vendimin si “goditje të rëndë” për luftën e UÇK-së, lirinë, pavarësinë dhe shtetin e Kosovës.
Në fund të komunikatës, PDK ka bërë të ditur se do ta kundërshtojë aktgjykimin përmes mjeteve demokratike dhe në forumet përkatëse.
“Ky aktgjykim nuk është fjala e fundit. Ne për drejtësinë do të luftojmë deri në fund dhe për të vërtetën nuk do të heshtim kurrë”, përfundon reagimi i PDK-së.
