Për PD-në, dy vendimet e fundit të qeverisë janë antikushtetuese, pasi abuzojnë me tokat e pronarëve. Deputeti Oerd Bylykbashi thotë se situata është e rëndë pasi bllokimi i Gjykatës Kushtetuese, pamundëson ankimimin e tyre.
Sa herë, kryeministri Rama përpiqet të vjedhë diçka në masë të madhe, e quan atë reformë. Deklarata erdhi nga nënkryetari i komisionit të ligjeve, Oerd Bylykbashi, i cili i referohet dy vendimeve të Këshillit të Ministrave.
Një vendim i Gjykatës së Lartë e Janarit 2009 ka përcaktuar qartë se kush ka titull edhe të paregjistruar, ai është i vlefshëm sepse regjistrimi, thekson vendimi i Gjykatës së Lartë.
Me dy VKM-të mbi pronën, kryeministri shkeli ligjin dhe këtë vendim të Gjykatës së Lartë, theksoi Bylykbashi. Bazuar në ligjin për investimin strategjik është qeveria, ajo që ndërhyn në shpronësimin e pronarëve nëse ekziston një ofertë strategjike, për të cilën investitori nuk bie dakort me pronarin.
Por problem më i madh nuk ka mbërritur ende, sipas tij. Shqiptarëve mund t’i mohoet titulli i pronësisë, mund t’i merret prona me VKM nga qeveria dhe të shpërblehet në vlerën 20% dhe gjatë gjithë kësaj kohe, shqiptarët nuk kanë asnjë shanc të gjejnë drejtësi në gjykatat e vendit./abcnews.al
