Sekretari amerikan i Shtetit Antony Blinken është takuar me Presidentin e Autoritetit Palestinez Mahmud Abbas në Ramallah, Bregu Perëndimor, të enjten.
Kjo është vizita e dytë e kryediplomatit amerikan në Bregun Perëndimor që nga fillimi i luftës Izrael-Hamas dhe vjen në mes të përshkallëzimit të dhunës së kolonëve izraelitë pas sulmit të 7 tetorit ndaj Izraelit.
Më herët të enjten, Blinken u takua në Jeruzalem me kryeministrin izraelit Benjamin Netanyahu dhe kabinetin e luftës, vetëm disa orë pas zgjatjes së armëpushimit me Hamasin.
Blinken “ripohoi mbështetjen e Shteteve të Bashkuara për të drejtën e Izraelit për t’u mbrojtur nga dhuna terroriste në përputhje me ligjin ndërkombëtar humanitar dhe i kërkoi Izraelit të marrë çdo masë të mundshme për të shmangur lëndimin e civilëve”.
“Sekretari Blinken theksoi se Shtetet e Bashkuara mbeten të përkushtuar ndaj hapave për krijimin e një shteti palestinez që jeton në paqe, liri dhe siguri së bashku me Izraelin”, tha zëdhënësi Matt Miller.
Blinken u takua gjithashtu me presidentin izraelit Isaac Herzog në Tel Aviv të enjten.
/abcnews.al
