Gjatë muajit maj, policia rrugore ka vijuar kontrollet me mjete civile dhe të uniformuara në rrugët urbane dhe ato interurbane me risk të lartë për aksidentet rrugore. Njoftohet se në fokusin e kontrolleve policore për muajin që lamë pas, krahas planeve operacionale “TISPOL”, në fokus ishin shkeljet e rregullave të qarkullimit rrugor.
Si rezultat i kontrolleve të ushtruara në funksion të parandalimit dhe rritjes së parametrave të sigurisë në rrugë:
Janë proceduar penalisht 145 drejtues mjetesh dhe motomjetesh, nga të cilët 95 për drejtim mjeti pa leje drejtimi dhe 50 për drejtim mjeti në gjendje të dehur;
Janë pezulluar 713 leje drejtimi, nga të cilat 416 për shpejtësi mbi normat e lejuara, 151 për drejtim mjeti nën efektin e alkoolit dhe 146 për shkelje të tjera;
Janë proceduar administrativisht 1700 drejtues motomjetesh, për mospërdorim të kaskës mbrojtëse;
Janë proceduar administrativisht 1650 drejtues mjetesh, për përdorim të aparatit celular gjatë drejtimit të mjetit;
Janë proceduar administrativisht 165 drejtues mjetesh, për mosrregullim shpejtësie dhe gara me shpejtësi në qendrat e banuara;
Janë proceduar administrativisht 325 drejtues mjetesh, për mosdhënie përparësie ndaj këmbësorëve në vendkalimet e tyre;
Janë proceduar administrativisht 760 drejtues mjetesh dhe pasagjerë, për mospërdorim të rripit të sigurisë dhe sistemeve të fiksimit për pasagjerët deri në 12 vjeç;
Janë shoqëruar për verifikim, për llogari të strukturave të tjera policore, 76 automjete me targa regjistrimi të shteteve të huaja apo me targa për qarkullim prove;
Janë konstatuar dhe sekuestruar në cilësinë e provës materiale dy automjete të dyshuara si të vjedhura jashtë vendit;
Gjithashtu janë vendosur edhe 5673 masa për shkelje të tjera të rregullave të qarkullimit rrugor. /abcnews.al/
