Loading ...
Para pak ditësh Zinedine Zidane dha dorëheqjen nga drejtimi i Real Madrid, me klubin që e pranoi dhe vendosi ndërprerjen e kontratës. Sot në të përditshmen AS, francezi ka publikuar një letër të gjatë, ku tregon gjithë pakënaqësitë e tij ndaj klubit dhe personalisht ndaj presidentit Perez, nga i cili do kishte dashur një trajtim më të denjë, për hir të gjithë arritjeve të Zidane.
“Kam vendosur të largohem dhe dua të shpjegoj arsyet mirë. Po shkoj, por nuk jam u hedhur nga barka dhe nuk jam lodhur nga puna ime. Në maj të vitit 2018 u largova sepse pas dy vitesh e gjysmë me kaq shumë fitore dhe kaq shumë trofe ndjeva se ekipit i duhej një diskurs i ri për të qëndruar në krye. Sot gjërat janë ndryshe.
Po largohem sepse e ndiej që klubi nuk më jep më besimin që më duhet, nuk më ofron mbështetje për të ndërtuar diçka në planin afatmesëm ose afatgjatë. Unë e njoh futbollin dhe i di kërkesat e një klubi si Real Madrid, e di që kur nuk fiton duhet të shkosh. Por këtu një gjë shumë e rëndësishme është harruar, gjithçka është harruar çfarë kam ndërtuar në baza ditore, atë që kam kontribuar në marrëdhëniet me lojtarët, me 150 njerëzit që punojnë me mua dhe rreth skuadrës.
Unë jam fitues i lindur dhe isha këtu për të fituar trofe, por përtej kësaj janë njerëzit, emocionet, jeta dhe kam ndjesinë që këto gjëra nuk janë vlerësuar. Kjo nuk është kuptuar dhe nuk është ruajtur dinamika e një klubi të mrekullueshëm. Madje, në një farë mënyre, unë jam fyer.
Do të më pëlqente që muajt e fundit marrëdhënia ime me klubin dhe presidentin të kishte qenë pak më ndryshe nga ajo e trajnerëve të tjerë. Nuk po kërkoj privilegje, sigurisht që jo, por pak më shumë kujtesë për arritjet e mia. Sot jeta e një trajneri në stolin e një klubi të madh është dy sezone, jo shumë më tepër. Unë kam 20 vite në këtë klub.
Për të zgjeruar më shumë marrëdhëniet njerëzore është diçka thelbësore, është më e rëndësishme se paratë, më e rëndësishme se fama, më e rëndësishme se gjithçka. Kjo është arsyeja pse më dhembi shumë kur lexova në shtyp, pas një humbjeje se ata do të më përjashtonin nëse nuk fitoja ndeshjen tjetër.
Kjo më lëndoi mua dhe gjithë ekipin sepse këto mesazhe të rrjedhura qëllimisht në media, krijuan ndërhyrje negative në staf, krijuan dyshime dhe keqkuptime. E mira ishte se kisha disa djem të mrekullueshëm, që ishin gati vdisnin me mua. Kur gjërat u shëmtuan, ata më shpëtuan me fitore të mëdha. Sepse ata besuan te unë dhe ata e dinin se unë besoja te ata.
Sigurisht që unë nuk jam trajneri më i mirë në botë, por unë jam i aftë të jap forcën dhe besimin që i duhet gjithsecilit në punën e tij, qofshin ata lojtarë, anëtarë të stafit stërvitor apo ndonjë punonjës i thjeshtë. Unë e di saktësisht se çfarë i duhet një ekipi”, shkruan ndër të tjera Zidane. /abcneës.al
