12 ikona të piktorit Diço Zografi prezantohen për herë të parë në muze

Nga Leontina Nika

Këto janë ikonat e shpëtuara pas shkatërrimit të kishës së Shën Kollit e shekullit të 17, në Elbasan  Koleksioni i piktorit Diço Zografi prezantohet për herë të parë nga fondi i Muzeut Historik Kombëtar, në sallën e ekspozimit.

Krahas 200 vjetorit të lindjes së piktorit me origjinë nga Maqedonia e Veriut, është përzgjedhur ky piktor dhe kjo periudhë si shenjë përbashkuese e disa vendeve të Ballkanit, thekson drejtori i muzeut Historik Kombëtar Dorian Koçi.

“Nga vitet 1850 e këtej nuk kishte marrë vlerësimin e drejtpërdrejtë. Ne menduam se ishte koha për ta nxjerrë në pah edhe në kuadër të muajit të Europës meqenëse piktura post bizantine është një pikturë që bashkon disa nga popujt e Ballkanit.”

Në një kënd të veçantë u paraqiten edhe disa objekte prej ari dhe argjendi: një kryq, mbulesa ikonash dhe kapakë ungjilli.

“Një nga më kryesoret që del për herë të parë është nga qyteti i Beratit, është i vitit 1833, në fakt përbën edhe një risaktësim të fondit tonë. I përket një argjendari vendas…”

Disa prej ikonave shfaqin nevojë emergjente restaurimi. Ministrja e Kulturës Elva Margariti premtoi restaurimin e tyre. Në fondin e Muzeu Historik Kombëtar ruhen 700 ikona, 60 prej tyre prezantohen në pavijonin e ikonave mes tyre edhe një vepër e Onufrit.  Ndërsa  640  ekspozohen shumë rrallë. /abcnews.al/