Diego Maradona humbi jetën 25 nëntorin e vitit të kaluar, pak ditë pasi kishte festuar 60-vjetorin e lindjes. Arresti kardiak e largoi nga kjo botë kampionin dhe një nga personazhet më popullorë të futbollit.
Dy ditë më parë hetimet në lidhje me vdekjen e “El Diez” morën një kthesë të papritur. Plot shtatë persona akuzohen për vrasje me dashje, mes tyre edhe mjeku Leopoldo Luque. Ky i fundit ka mohuar akuzat në prononcimin e dhënë për mediat argjentinase.
“Tani nuk ka më paqe, as për Maradonën dhe as për mua. Situata u përkeqësua prej pandemisë. Në aspektin psikologjik, por edhe prej varësisë së Diegos nga alkooli. Në autopsi shkruhet se Diego ka qëndruar për disa orë në agoni, por është përfundim i gabuar.
Një person që ndodhet në agoni nuk mund të qëndrojë në pozicion horizontal, Diego dukej sikur po flinte. Ndodhesha në sallën e operacionit kur më telefonoi asistenti i Maradonës, Maxi Pomargo, i cili më tha se Diego kishte pësuar arrest kardiak. Mendova se po bënte shaka.
Ndjej dhimbje kur lexoj komente që jemi ne atë që i shkaktuam vdekjen. Nuk është e vërtetë, unë e kam ndihmuar Diegon, teksa shumë persona i kthyen shpinën. Personalisht, unë ndihem krenar për atë që kam bërë për të“, deklaroi Luque. /abcnews.al
