Joel Glazer, presidenti i Manchester United, ka marrë guximin për t’u kërkuar falje tifozëve të “Djajve të Kuq” për shkak se përfshinë klubin e zemrës në projektin e European Champions League që mori kritika në të gjithë Europën. Kreu i klubit anglez, në letrën e tij publike shkruan:
“Për të gjithë mbështetësit e Manchester United, gjatë ditëve të kaluara, të gjithë kemi qenë dëshmitarë të pasionit të madh që jep futbolli dhe besnikërisë së thellë që tifozët tanë kanë për këtë klub të shkëlqyeshëm. Ju e bëtë shumë të qartë kundërshtimin tuaj ndaj Superligës Evropiane dhe ne ju kemi dëgjuar. E kuptuam gabimin dhe duam të tregojmë se mund t’i rregullojmë gjërat.
Megjithatë plagët janë të hapura ende, ndaj e kuptoj që do të duhet kohë që plagët të shërohen. Unë personalisht jam i përkushtuar për të rikthyer besimin te tifozët tanë dhe të mësoj nga mesazhi që ju na dhatë me bindje të plotë.
Ne vazhdojmë të besojmë se futbolli evropian duhet të bëhet më i qëndrueshëm në të gjithë piramidën për një periudhë afatgjatë. Sidoqoftë, ne e pranojmë plotësisht që Super League nuk ishte mënyra e duhur për të arritur atë qëndrueshmëri.
Duke kërkuar të krijojmë një themel më të qëndrueshëm për lojën, nuk arritëm të tregojmë respekt mjaftueshëm për traditat e saj me rrënjë të thella – ngjitja, rënien dhe piramida – dhe për këtë na vjen keq. Ky është klubi më i madh i futbollit në botë dhe ne kërkojmë falje për trazirat e shkaktuara gjatë këtyre ditëve të fundit.
Është e rëndësishme për ne t’i vendosim gjërat në vendin e duhur. Manchester United ka një trashëgimi të pasur dhe ne pranojmë përgjegjësinë tonë për të respektuar traditat dhe vlerat e mëdha të këtij klubi.
Pandemia ka sjellë kaq shumë sfida unike dhe ne jemi krenarë për mënyrën se si Manchester United dhe tifozët e tij nga Manchesteri dhe nga e gjithë bota kanë reaguar, në një moment të vështirë si ky. Ne gjithashtu e kuptojmë se duhet të komunikojmë më mirë me ju, tifozët tanë, sepse ju gjithmonë do të jeni në qendër të klubit.
Duhet të jeni të sigurt se ne do të ndërmarrim hapat e nevojshëm për të rindërtuar marrëdhëniet me palët e tjera të interesit, me synimin për të punuar së bashku për zgjidhjet e sfidave afatgjata me të cilat përballet piramida e futbollit.
Tani për tani përparësia jonë është të vazhdojmë të mbështesim të gjitha ekipet tona, ndërsa ato luftojnë për një mbyllje sa më dinjitoze të sezonit. Në mbyllje, unë do të doja të pranoja që është mbështetja juaj ajo që e bën këtë klub kaq të madh, dhe ne ju falënderojmë për këtë. Me respekt, Joel Glazer”. /abcnews.al
