Thomas Tuchel mori drejtimin e Chelsea më 26 janar dhe ia ka dalë të bëjë një punë fantastike në një kohë shumë të shkurtër. “Blutë e Londrës” eliminuan Porton dhe do të përballen në gjysmëfinalet e Champions League me fituesin e çiftit Real Madrid-Liverpool.
Mason Mount është një nga lojtarët më në formë të skuadrës angleze. 22-vjeçari zbulon për BT Sport se çfarë ka ndryshuar me ardhjen e trajnerit gjerman, teksa thekson se nuk ka preferenca se cilin ekip do donte si kundërshtar në gjysmëfinale.
CHELSEA – “Jemi në rrugën e duhur për të bërë mirë. Kush zbret në fushë e ka të qartë se do të paraqitet mirë. Jemi të përqendruar në çdo ndeshje dhe kemi besim 100% tek aftësitë tona. E dimë që fundi i sezonit do të jetë shumë impenjues, por jemi gati”.
CHAMPIONS – “Nuk kemi preferenca, jemi gati të përballemi me çdo skuadër në gjysmëfinale (Real Madrid ose Liverpool). Ekipi më i fortë do të kualifikohet, por ne jemi gati të luftojmë. Nuk është e thjeshtë të luash në këto nivele të larta”.
TUCHEL – “Trajneri ka pasur një ndikim të madh te ne. Nuk është e thjeshtë të marrësh drejtimin e ekipit në mes të sezonit, por ne e dinim që nga dita e parë se çfarë donte ai. I kemi realizuar kërkesat e tij në çdo ndeshje. Po punojmë shumë, jo më kot ndodhemi në këtë nivel”. /abcnews.al
