PSG fitoi 2-3 përballë Bayern Munchen, por kualifikimi në gjysmëfinalet e Champions League nuk është siguruar akoma. Ekipi i Hansi Flick do të bëjë të pamundurën për të përmbysur gjithçka në sfidën e kthimit, që luhet të martën në mbrëmje (13 prill).
Trajneri i kampionëve të Francës, Mauricio Pochettino i gëzohet rikthimit të Marco Verrattit dhe Alessandro Florenzit. Dy lojtarët italianë lanë pas krahëve koronavirusin dhe do t’i bashkohen ekipit në stërvitje, mesfushori sot dhe anësori i djathtë nesër.
Ndërkohë, drejtuesit e PSG-së janë futur në garë për Momo Salah. Qëndrimi i Kylian Mbappe është i pasigurt dhe ylli i Liverpool shihet si pasardhësi perfekt i sulmuesit francez. Telefoot raporton se PSG ka kontaktuar agjentin e sulmuesit egjiptian.
Momo Salah është kthyer në objektivin kryesor të nënkampionëve të Evropës për repartin e sulmit, ndërsa emrat e tjerë që pëlqehen janë Leo Messi dhe Harry Kane i Tottenham. /abcnews.al
