Është Taulant Balla ai që ka marrë përsipër këtë të enjte ti përgjigjet deklaratave të kryedemokratik Lulzim Basha.
Taulant Balla, kryetar i Grupit Parlamentar të PS: “Me gjoja propozime antimafia, luftë kundër oligarkëve. A mund ta besojë kush në Shqipëri se mund të bëjë luftë kundër oligarkëve, gjobaxhiu i oligarkëve Lulzim Basha.”
Kryetari i grupit paralmentar socialist thotë se mjafton ti referohesh se çfarë ka ndodhur me kompaninë e kunatit dhe bashkëshortes së Lulzim Bashës.
“Landmark quhej njëra prje tyre e cila faturonte rreth 2 miliardë para nga këto kompani të oligarkëve. A është kjo Lulzim Basha, gjobë që ti u vendos kompanive për të mos u përmendur emri këtu në parlament. Nuk mund të bësh ligj ti Lulzim nëpër hotelet, sallat e të cilëve nuk dihet kush ti paguan.”
Propozimeve të demokratëve për Vetting në politikë u thotë prerë se nuk mungojnë institucionet që duhet ta bëjnë.
“Nuk ka asnjë përgjigje tjetër më të mirë se sa byroja kombëtare e hetimit dhe prokuroria speciale antikorrupsion.”
Opozita turistike siç e cilëson Taulant Balla duhet të jetë në parlament për të diskutuar mbi ligje të rëndësishme siç është ligji për dhënien e trojeve bujqësore me qira. Kreu deputeteve socialistë kërkoi hartimin e një ligji të ri ku të rishikohen të gjitha kontratat e dhënieve me qira të tokave.
“Nuk mund, nga njëra anë Balilëve tu sekuestrojme hotelin dhe nga ana tjetër 90ha tokë të marra me qira po nga shteti të mos kemi mmundësi të mos ia sekuestrojmë. Edmond Panariti ish ministër i Bujqësisë së LSI, ka firmosur atë kontratë, por kjo nuk mund të jetë sot e vlefshme nëse ne nuk gjejmë hapësira ligjore që atë kontratë ta bëjmë të pavlefshme.”
Në seancën e fundit plenare janë votuar disa nga ligjet e parashikuara për rendin e ditës. Ndërsa projektligji për “Magjistratët” nuk u hodh në votim pasi kërkon praninë deputetëve të opozitës në parlament./abcnews.al
