Manchester United e mbylli në barazim 0-0 ndeshjen e mbrëmjes së kaluar jashtë shtëpie kundër Crystal Palace. Barazimi i tretë radhazi pa gola për “Djajtë e Kuq”, të cilët kanë humbur diçka në aspektin sulmues.
Një gjë të tillë e pranon edhe trajneri Ole Gunnar Solskjaer, i cili shfaqet i shqetësuar dhe pret reagimin e sulmuesve të tij. “E goditëm vetëm njëherë portën e Crystal dhe kjo gjë na shqetëson.
Në ndeshjet e fundit po bëjmë shumë pak në sulm, po luajmë çdo tre ditë dhe është normale të mos jemi brilantë. Gjithsesi, e kemi kualitetin për t’u përmirësuar dhe për t’u rikthyer te shënimi i shumë golave, siç kemi bërë më parë.
Rashford? Nuk dua të ndalem te performanca e një lojtari. Ndaj Crystal Palace vuajtëm të gjithë në metrat e fundit, sigurisht që nuk mund të jemi aspak të lumtur. Nuk kemi pësuar, e vërtetë, por jemi në një moment kyç të sezonit.
Jam i kënaqur me impenjimin e djemve, por duhet të kthehemi të luajmë një futboll cilësor dhe të shfaqemi më të rrezikshëm përpara portës kundërshtare“, theksoi Solskjaer. /abcnews.al
