CEO i Netflix ka deklaruar se në të ardhmen shumë filma do të publikohen në data të përbashkëta në kinema dhe në Netflix, për shkak të ndryshimeve të pandemisë.
Kinematë tradicionalisht kanë shijuar një periudhë ekskluziviteti, e njohur si dritarja e shfaqjes teatrale. Por pandemia ka bërë që shumë filma të shihen në platformat streaming. Shefi i Netflix Greg Peters tha se pandemia ka treguar se kjo është ajo çfarë konsumatoret duan.
Phil Clapp, shefi ekzekutiv i Shoqatës së Kinemasë në Mbretërinë e Bashkuar, tha për BBC News : “Ajo që dimë është se shumica mendojnë se vendi më i mirë për të parë një film është kinemaja.”
“Pas pothuajse një viti të kufizuar për shkak të pandemisë, audiencat mezi po presin shansin për të shijuar edhe një herë përvojën e ekranit të madh.”
Pandemia Covid-19 vazhdon të ketë një ndikim të madh në industrinë e kinemasë, me kinematë në mbarë botën kryesisht të mbyllura gjatë vitit të kaluar. Shumë filma janë pezulluar, përfshirë pjesën e fundit të James Bond No Time To Die, Black Widow të Marvel dhe Top Gun 2.
Në tetor, Cineworld njoftoi mbylljen e përkohshme të kinemave të saj në Mbretërinë e Bashkuar, duke rrezikuar 5,500 vende pune. Danny Boyle, Steve McQueen dhe prodhuesit e tjerë kryesorë britanikë të filmave i kanë bërë thirrje qeverisë së Mbretërisë së Bashkuar që të ofrojë mbështetje financiare për zinxhirët e mëdhenj të kinemasë në Britani.
Të Mërkurën, Kancelari i Mbretërisë së Bashkuar Rishi Sunak alokoi 390 milion paund për të ndihmuar hapjen e vendeve të artit në Angli si pjesë e buxhetit vjetor. Në vitin 2019, nëntë filma shtuan në arkën globale 1 miliard dollarë përfshirë The Lion King, Joker, Avengers: Endgame dhe Captain Marvel.
Ndërsa vitin e kaluar Tenet e Christopher Nolan – një film me një buxhet prej 205 milion dollarë – ishte i vetmi film u shfaq në kinema, me fitime që kapën vlerën e 350 milion dollarëve.
Beteja për datën e publikimit
Kjo situatë e vështirë financiare, e shoqëruar me rritjen e shërbimeve të transmetimit në shtëpi, ka përshkallëzuar tensionet midis regjisorëve dhe studiove të produksionit.
Në dhjetor, pronarë të kinemave Odeon në SHBA zhvilluan mbledhje urgjente me Warner Bros pasi prodhuesi i filmit tha që të gjitha shfaqjet do të ishin në dispozicion për t’u transmetuar menjëherë në SHBA.
Ata fillimisht kishin rënë dakord të lejonin që vetëm një film, Wonder Woman 1984, të shfaqej njëkohësisht në HBO Max. Më pas të dy firmat përfundimisht ranë dakord në korrik që filmat Universal mund të ofrojnë shërbime digjitale vetëm 17 ditë pasi janë shfaqur në kinema./abcnews.al
