Milani është gati për derbin ndaj Interit. Dueli i zjarrtë i Serie A do të luhet mesditën e nesërme, duke nisur prej orës 15:00. Trajneri i “Djallit”, Stefano Pioli flet hapur në konferencën për shtypin, aty ku thekson se djemtë e tij do të futen në fushë vetëm për fitore.
“Gjithmonë kam besuar te puna jonë dhe tek ambicia e këtij klubi. Kemi nisur një rrugëtim që po na dhuron rezultate shumë të mira. Kemi dëshirë për të zhvilluar një ndeshje të madhe ndaj Interit, duam të rikthehemi në krye të Serie A.
Nuk është një ndeshje vendimtare, por sigurisht që ka një rëndësi të madhe. Dy ndeshjet tona të fundit nuk kanë qenë ndër më të mirat, por nuk na e kanë hequr bindjen dhe sigurinë te cilësitë dhe forca jonë. Nesër do të shihni një Milan më të fortë.
Rrezikojmë të humbasim nëse futemi në fushë me idenë e marrjes së një barazimi, kështu që duhet të zbresim në fushë me dëshirën për të marrë tre pikët. A firmos për një barazim? Absolutisht jo. Duhet të luajmë si skuadër, kolektivi nxjerr në pah edhe cilësitë individuale.
Mandzukic? Mario ka pasur një dëmtim të lehtë dhe sot ka nisur nga puna. Uroj të mos jetë një mungesë e gjatë. Më vjen, pasi sapo po e merrte veten fizikisht dhe po rikthehej në formë“, përfundoi trajneri i Milanit, që renditet në vend të dytë me një pikë më pak se Interi. /abcnews.al
