Gjykata e Fierit ka lënë në burg gruan 42 vjeçare që i vuri flakën shtëpisë dhe tentoi të mbyste në lumin Seman dy fëmijët e saj të vegjël. Rudina Kishta tha para trupit gjykues se i vuri flakën shtëpisë për shkak se burri i saj ishte pijanec dhe e dhunonte.
Rudina Kishta, e cila i vuri flakën shtëpisë së bashkëjtuesit dhe tentoi të mbyste dy fëmijët e saj në lumin Seman, nuk nguroi tu fliste gazetarëve para se të niste seancën për masën e sigurisë. Ajo u tha atyre ato që kishte pranuar edhe para prokurorit. Burri pinte alkool dhe e dhunonte. Ky është shkaku, sipas saj, që dogji shtëpinë. Kurse për fëmijët, ajo tha se donte të tërhiqte vëmendjen që shteti ti marrë e të kujdeset për to sepse nuk mund ti rrisë e ti ushqejë.
Por masa e sigurisë “burg pa afat” nuk vonoi për Rudina Kishtën. Në pak minuta, gjykatësi Taulant Banushi, vendosi arrestin dhe urdhëroi edhe ekspertizën psikiatrike për 42 vjeçaren. Mbi Kishtën rëndon akuza e tentativës për vrasje dhe zjarrëvënie me qëllim. Çifti kishte dy vjet që ishin martuar, por pasi jetuan 6 muaj ishin ndarë dhe pas një periudhe ishin ribashkuar. Kjo gjë ka ndodhur disa herë. E diela e javës që shkoi ishte hera e fundit që Ardian Gjika shkoi ta merrte gruan e tij duke e bindur që ajo kthehej./abcnews.al
