Lideri i opozitës Lulzim Basha, këtë të dielë ka zhvilluar një takim me të rinjtë.
Fokusi në këtë takim ishin problemet e të rinjve dhe jo vetëm, mundësitë e punësimit si edhe problemet ekonomike.
I pyetur nga studentët, Basha ngriti shqetësimin për situatën e krijuar nga pandemia e COVID-19, që ka sjellë një krizë të thellë në ekonomi për shkak edhe të keqmenaxhimit nga qeveria.
“Pikërisht prej dështimit të Edi Ramës për të dhënë një paketë minimalisht sa paketa e Kosovës, ne futemi në një zinxhir negativ, zinxhir rënie të thellë ekonomike e cila siç e keni parë dhe siç e ka raportuar Banka Botërore, FMN dhe institucionet e tjera, është pothuajse dyfish i rënies ekonomike të vendeve të tjera të rajonit.
Justifikimin e kemi dëgjuar pse nuk është bërë një paketë e tillë, sepse kaq para kemi, por nga ana tjetër janë marrë borxh pothuajse 1.1 miliardë euro dhe është dhënë një paketë ekonomike 102 milionë euro! Pra, para ka. Ku shkojnë këto para!? Ku shkojnë 1 miliardë euro të tjera që janë marrë borxh!?
Shpenzimet publike të qeverisë kanë shkuar në dy drejtime kryesore, në të famshmin program të PPP-ve dhe koncesioneve , ku është detyruar shteti me një shumë marramendëse prej 2.2 miliardë eurosh që rritet nga viti në vit dhe në të ashtë-quajturin program të “Rilindjes Urbane”, pra, investime kryesisht në fasada”, tha Basha.
Gjithashtu gjatë bisedës Basha tha se rruga e rrënimit ekonomik duhet braktisur.
“Jemi vendi i fundit në investimet në ekonomi, shëndetësi. A mund të vazhdohet kështu? As edhe një ditë të vetme. Dhe për këtë janë të vetëdijshëm edhe socialistët. Kam takuar dhjetëra socialistë nëpër Shqipëri të cilët janë të mllefosuar, jashtë tepsisë së “Rilindjes”. Pra një reformë e qeverisjes do të sjellë ri-dimensionimin. Taksat duhet të shkojnë për të nxitur ekonominë”, u shpreh kreu i opozitës Lulzim Basha.
/abcnews.al/
