Victor Font është një nga kandidatët për postin e presidentit të Barcelonës. Në zgjedhjet e ardhshme ai do të kandidojë përballë rivalëve si Toni Freixa, Jordi Farre, Agusti Benedito dhe Emili Rousaud.
48-vjeçari ka plane të qarta, trajner do të zgjedhë Xavin, teksa do të bëjë të pamundurën për të mbajtur Leo Messin në skuadër, gjithmonë nëse ia del të fitojë garën për kreun e klubit katalanas.
“Xavi është personi më i mirë i mundshëm për të drejtuar projektin tonë sportiv. Dua që Messi të na dëgjojë se çfarë planesh kemi dhe çfarë qëllimesh kemi. Duhet të marrë vesh projektin tonë“, deklaron Font për Cadena Cope.
Ish-kapiteni Xavi, i cili ka nisur karrierën e trajnerit, është arma e fortë e Font për të bindur “pleshtin” të mos largohet dhe të mbyllë karrierën në “Camp Nou”.
“Leo është thelbësor për ne, nuk duhet të largohet dhe jam i sigurt që Xavi do e bindë të qëndrojë. Messi është i pazëvendësueshëm për Barcelonën dhe për ne“, deklaron Font. /abcnews.al
