Justin Bieber është hapur së fundmi për problemet me shëndetin mendor. Duke folur në dokumentarin “Justin Bieber: Next Chapter”, këngëtari 26-vjeçar tha se ka patur momente në të kaluarën që ka menduar vetëvrasjen.
“Ka pasur momente kur kam pasur vërtet mendime vetëvrasjeje. Mendoja nëse do të shuhet ndonjëherë kjo dhimbje? Ishte kaq e qëndrueshme, dhimbja ishte aq e qëndrueshme.”, tha Bieber.
Këngëtari thotë se dëshiron të ndihmojë të tjerët dhe t’i inkurajojë ata që të flasin, duke pranuar se mund të kishte shmangur shumë dhimbje nëse do ta kishte bërë këtë gjë.
“Unë ndihem kaq i qetë për herë të parë në jetën time…Thjesht do të inkurajoja njerëzit – Hej nëse ndiheni të vetmuar, flisni për këtë. Thuajeni me zë të lartë – Mund të kisha shmangur shumë dhimbje.”, shtoi ai.
Pasi dokumentari u transmetua të Premten, Justin shkroi në mediat sociale se ndihet mirë dhe se këto muaj e kanë ndihmuar të rritet dhe të ndihet më i lumtur dhe i shëndetshëm. /abcnews.al
