Ndërkohë që ka plasur ironia në rrjet në lidhje me deklaratën e saj për largimin nga detyra dhe Shqipëria në përfundim të mandatit, ministrja e Arsimit, Besa Shahini ka vendosur t’i rikthehet sërish “Turit”, personazhit të famshëm që u prishi punë më notat mijëra maturantëve.
Përmes një postimi në rrjetin sociale Facebook, Shahini shprehet se janë 12 mijë maturantë që kanë gjetur përgjigjen e saktë të pyetjes së Turit, shkruan abcnews.al.
“Për të gjithë ata që akoma pyesin se “Çfarë bëri Turi?”, dua t’ju rikujtoj se janë rreth 12 mijë maturantë (17-18 vjeçarë) që e kanë dhënë përgjigjen e saktë në këtë pyetje.
Pra, gjithandej në Shqipëri ka të rinj më mirë të arsimuar se sa ata që po përpiqen të kritikojnë reformat e PS-së në arsim”, shkruan Shahini.
Historia e Turit nisi në fillim të verës, kur mijëra maturantëve iu kërkua t’i përgjigjeshin një pyetjeje në testin e Letërsisë, mbi një veprim të supozuar të personazhit në fjalë duke ngjallur mjaft batuta më pas mes tyre. /abcnews.al
