Loading ...TIRANË – Shqipëria shënon një tjetër hap të rëndësishëm drejt anëtarësimit në Bashkimin Europian. Sot, në Luksemburg, zhvillohet Konferenca e 10-të Ndërqeveritare Shqipëri–BE, ku pritet të formalizohet mbyllja e negociatave për Kapitullin 20, “Ndërmarrjet dhe Politikat Industriale”.
Zëvendësministri i Ekonomisë dhe Inovacionit, Martin Kajo u shpreh mbyllja e këtij kapitulli është një hap i rëndësishëm në rrugën që Shqipëria të bëhet pjesë e BE-së.
Gjatë një interviste për “News Line”, Kajo theksoi se mbyllja e kapitujve është sfiduese, që kërkon shumë punë dhe angazhim.
Ai theksoi se institucionet janë në krye të detyrës dhe po punojnë për të çuar përpara objektivin madhor për mbylljen e të gjithë kapitujve deri në fund të vitit 2027.
“Një hap më afër e integrimit të Shqipërisë në BE. Është një moment shumë i rëndësishëm dhe jemi shumë të lumtur për këtë moment. Të gjithë kapitujt janë sfidues, kërkojnë punë dhe angazhim të madh. Puna dhe angazhimi po jepet nga e gjithë qeveria dhe e gjithë administrata”, tha ai.
Ai theksoi se sfida kryesore është që reformat e ndërmarra të shndërrohen në rezultate konkrete dhe të prekshme.
“Nga dita e sotme, prioritet mbetet formalizimi dhe mbyllja e këtij kapitulli, ndërsa ne jemi të përqendruar për mbylljen e kapitujve të tjerë. Mbyllet një kapitull shumë i rëndësishëm për ekonominë tonë, për bizneset tona.
Me mbyllje e kapitujve, integrimi ynë bëhet më i afërt. Sfida është që këto reforma të kenë rezultate konkrete.Sfida për biznesin shqiptar dhe ekonominë shqiptare është e madhe, por njëkohësisht benefitet janë shumë të mëdha. Tregu i BE është një treg i madh dhe kjo është një mundësi për biznesin shqiptar. Kompanitë shqiptare duhet të rrisin pjesën e konkurrueshmërisë”, theksoi ai.
