Loading ...
Formula 1 po përgatitet të rikthehet në Afrikë pas një mungese prej më shumë se tridhjetë vitesh. Federata Ndërkombëtare e Automobilizmit ka arritur një marrëveshje dhjetëvjeçare me Ruandën për të organizuar një garë “Grand Prix” në këtë vend, duke filluar nga viti 2030. Ndonëse data e saktë e debutimit nuk është përcaktuar ende, marrëveshja shënon një hap të rëndësishëm në strategjinë e zgjerimit ndërkombëtar të kategorisë kryesore të sporteve motorike, e cila synon të zhvillojë gara në të gjitha kontinentet.
Gara e fundit e Formula 1 në Afrikë u zhvillua në vitin 1993 në pistën Kyalami në Afrikën e Jugut, ku Alain Prost fitoi Çmim të Madh duke drejtuar një makinë Ëilliams. Që atëherë, pavarësisht përpjekjeve të përsëritura për ta rikthyer këtë sport në kontinent, asnjë event nuk ka arritur të sigurojë një vend të përhershëm në kalendarin e kampionatit. Gara do të zhvillohet në një pistë të përhershme të ndërtuar rishtazi në Bugesera, e cila ndodhet rreth 40 kilometra në jug të kryeqytetit Kigali dhe pranë aeroportit të ri ndërkombëtar të qytetit.
Siç ka shpjeguar Formula 1, pista do të shfrytëzojë ndryshimet e nivelit të terrenit në rajon për të krijuar një trasé unike dhe teknikisht sfiduese, duke garantuar gjithashtu pozicione të shkëlqyera shikimi për spektatorët.
Një rikthim në Afrikë përfaqëson një mundësi të re rritjeje për Formula 1, e cila ka zgjeruar praninë e saj globale vitet e fundit. Krahasuar me Evropën, Azinë dhe Amerikat, kontinenti afrikan mbetet një treg kryesisht i pashfrytëzuar, pavarësisht se ka një bazë të konsiderueshme tifozësh dhe një audiencë të re në moshë. Mbetet ende për t’u përcaktuar se në cilën periudhë të vitit do të planifikohet gara. Për më tepër, Formula 1 synon ta mbajë kalendarin brenda kufirit prej 24 garash për sezon; rrjedhimisht, përfshirja e Ruandës do të duhet të harmonizohet me ekuilibrin organizativ të kampionatit./abcnews.al
