Lebron Xhejms pësoi një nga humbjet më të mëdha të karrierës në plej ofin e basketbollit amerikan. Skuadra e tij, Cleveland-i, u mund thellë nga Bostoni në finalen e parë të Lindjes.
Edhe pse ishin jashtë fushe, cilësoheshin favoritë, por nuk e respektuan dot parashikimin.
Nënkampionët në fuqi të NBA-së, basketbollistët e Cleveland-it, pësuan një humbje të rëndë në fushën e Bostonit, në ndeshjen e parë finale të Konferencës Lindore.
Është natyrisht vetëm fillimi, veç përballja e parë nga shtatë të mundshme, por disfata me shifrat 83-108 ishte tronditëse.
Lebron Xhejms, më së shumti në hije dhe i mbuluar fort nga kundërshtarët, përjetoi humbjen e dytë më të rëndë të karrierës në plej of, ndërsa nuk mundi të tregonte ato cilësi që e bënë lojtarin më të mirë të plej ofit deri tani.
Boston Celtics, rekordmen i titujve në NBA, nuk e pati problem mungesën për shkak dëmtimit të yllit kryesor, Kyre Irving, të ardhur pikërisht nga Klivlendi.
Vendasit përdorën moshën e tyre të re për t’i mposhtur rivalët më shumë të vlerësuar.
Yjet e rinj të tyre, si Morris, Tatëm, Horford, Braun apo Rozier ishin tepër të shpejtë për t’u mbuluar nga lojtarët më të vjetër të Kavaliersit.
Xhejms mundi të shënonte vetëm 15 pikë, ndonëse kapi 7 topa në tabela dhe shërbeu 9 asistë.
A mendohet që Bostoni të vazhdojë të dominojë dhe të arrijë në finalen e madhe të NBA-së?
Duhet të pritet ndeshja e dytë finale në Lindje, që do të luhet duke u gdhirë e mërkura në Shqipëri, dhe që do të jetë sërish në Boston.
Nëse vendasit fitojnë, atëherë Klivlendi dhe Lebroni do të jenë në telashe të mëdha, ndërsa nëse rezultati barazohet, atëherë sfida mund të përfundojë ndryshe./abcnews.al
