Specialistet e shëndetit publik kanë kërkuar rishikim të masave anti Covid-19 për funksionimin e shkollave këtë vit.
Ky udhëzuesi i ri i masave anti-Covid-19 është miratuar nga Komiteti Teknik i Eksperteve.
Në këtë udhëzues ISHP ka dhënë rekomandimet për mënyrën sesi nxënësit duhet të hynë dhe dalin nga ambientet e shkollës, për qëndrimin dhe zhvillimin e mësimit në klasa, për mënyrën sesi do të bëhet lëvizja në mjediset e brendshme të shkollës etj.
Sipas udhëzimeve të ISHP, nxënësit duhet të hyjnë në shkollë pasi janë vendosur në radhë një nga një, me largësi 2 metra. Ndërsa, nëse ka simptoma të ngjashme apo temperaturë përpara ardhjes në shkollë, duhet të njoftojë mësuesin kujdestar, i cili, në bashkëpunim me mjekun e shkollës ose atë të familjes verifikon nëse nxënësi është i sëmurë apo jo.
Po ashtu në udhëzim thuhet se personi përgjegjës i caktuar nga shkolla duhet që të masë temperaturën me termometër digjital tek çdo nxënës, duhet t’i ndihmojë me dezinfektimin e duarve, t’i kontrollojë nëse janë të pajisur me maskë dhe për shami letre për higjienën e hundëve.
Theksohet po ashtu se nxënësit që nuk zbatojnë rregulloret, trajtohen me masë disiplinore nga Komisioni i Etikës dhe i Sjelljes.
Hyrja dhe dalja nga ambientet e shkollës
• Orari për hyrjen e nxënësve në shkollë rregullohet sipas një grafiku, hartuar nga drejtoria e shkollës dhe nën monitorimin e mësuesve të kujdestarisë ditore/javore.
•Nxënësit paraqiten në shkollë duke respektuar me përpikmëri orarin e komunikuar nga mësuesi kujdestar i tyre.
• Nxënësit hyjnë në shkollë pasi janë vendosur në radhë një nga një, me largësi 2 metra.
• Nxënësi që ka simptoma të ngjashme apo temperaturë përpara ardhjes në shkollë, njofton mësuesin kujdestar, i cili, në bashkëpunim me mjekun e shkollës ose atë të familjes verifikon nëse nxënësi është i sëmurë apo jo.
• Justifikimi i mungesës bëhet vetem nga mjeku i familjes.
• Personi përgjegjës i stafit të shkollës, i caktuar nga drejtori, duhet të kryej vlerësimin për çdo nxënës si më poshtë vijon:
➢ Matje të temperaturës me termometër dixhital;
➢ Sprucim me alkool 60% ose dezifektantë të tjerë në duar;
➢Duhet të kontrollohen të gjithë nxënësit që të jenë të pajisur me maskë me një përdorim ose mbrojtëse të fytyrës prej tekstili (maskë) të cilat duhet të lahen në 60 gradë dhe të hekurosen, si dhe shami letre për higjenën e hundëve;
• Sipas mundësive mund të vendosen vasketa/tapet/sfungjer me solucion dezinfektues me bazë të klorit aktiv, për desinfektimin e pjesëve të poshtme të këpucëve përpara hyrjes në ambjentet e brendshme të shkollës.
• Nuk lejohet që nxënësit të dalin nga godina dhe të rikthehen përsëri në të, brenda ditës.
• Dera e shkollës do të qëndrojë e mbyllur, ndërsa dritaret e klasave ku zhvillohet procesi mësimor, do të qëndrojnë të hapura për të krijuar ajrosjen e nevojshme brenda tyre.
• Lejohet vetëm një hyrje dhe një dalje në ndërtesën e shkollës.
• Dalja nga ambientet e shkollës do të bëhet sipas rregullave duke ruajtur distancimin social dhe fizik si me lart (jo më pak se 1.5 metra), nën mbikëqyrjen e mësuesve kujdestarë dhe të punonjësve të tjerë të shkollës. Drejtimi i vendosjes së femijëve vetëm në një kah apo një drejtim, njëri pas tjeterit.
• Nxënësit që nuk zbatojnë këtë rregullore, trajtohen me masë disiplinore nga Komisioni i Etikës dhe i Sjelljes.
Qëndrimi dhe mësimi në klasa
• Gjatë procesit mësimor, mësuesi qëndron në klasë duke respektuar distancimin social dhe fizik me nxënësit dhe mësuesit e tjerë, në 2 metra.
• Brenda klasës, nxënësit qëndrojnë të ulur nga një nxënës në bankë, dhe bankat në të paktën 1.5 metra larg njëra-tjetrës. Në klasat ku kjo nuk është e mundur, nxënësit do të ndahen në klasa të tjera.
• Në se transporti i nxenësve kryet me mjetet të transportit të dedikuara ose publik, duhet të mbahet maska gjatë gjithë kohës së transportit (vajtje-ardhje) dhe këto mjete duhet t’i nënshtrohen rigorozisht udhëzuesit për transportin .
• Nxënësve të ciklit të ulët 9 vjeçar u rekomandohet të mbajnë maskë gjatë orëve të mësimit.
• Nxënësit e cikilt të ulët 9 vjeçar duhet të mbajë maskë gjatë aktiviteteve jashtë orëve të mësimit në ambjentet të shkollës.
• Nxënësit e ciklit të lartë 9 vjeçar dhe të mesëm duhet të mbajnë maskë në ambjentet e brendëshme dhe në të gjitha aktivitetet mësimore në ambjentet e shkollës.
• Mësuesit sigurohen që në klasë të gjithë të jenë të pajisur me maskë dhe t’i mbajnë rregullisht ato.
• Nxënësit ndalohen të dalin nga klasa gjatë orëve të mësimit përveç rasteve kur i duhet të përdorin tualetet. Në këtë rast nxënësi duhet të shoqërohet.
• Kur është e mundur, praktikohet mësimi në ambient të hapur (oborr shkolle), duke respektuar largësinë dhe rregullat e mësipërme.
• Nuk lejohet ushqimi në klasë. /abcnews.al/
