koronavirusi

edi-rama-donatoret.jpg
nev ila23:35 | 31/03/2020

Kryeministri Rama përmes një postimi në facebook ka njoftuar se janë shëruar 15 persona ditën e sotme nga koronavirusi.

🟢 LAJM I MIRË: 15 TË SHËRUAR SOT🤩”, shkruan Rama.

Gjithashtu edhe Ministrja e shëndetësisë Ogerta Manstirliu ka njoftuar përmes facebook këtë lajm.

“LAJM I MIRË🙏🏼 Edhe 1️⃣5️⃣ të shëruar sot nga Covid-19. Shkon në 6️⃣7️⃣ numri i të shëruarve ✅”, shkruan Manastirliu.

Ndërkohë që shërimi i 15 personave të tjerë ka çuar numrin e total të tyre në 67 persona që ja kanë dalë në luftën kundër koronavirusit./abcnews.al

edi-rama-provokacija.gif
nev ila23:26 | 31/03/2020

Kryeministri Rama gjatë mbrëmjes së sotme në bisedë me gazetarin Mustafa Nano në ABC News deklaroi se, vetëm kur te kemi rëne konstante, të kurbës së pikut të infeksionit në Shqipëri, vetëm atëherë mund të fillojmë pak nga pak, ti rikthehemi jetës së mëparshme.

Sipas Ramës, kjo varet nga këmbëngulja dhe vendosmëria për të zbatuar rregullat, me të njëjtin zell si tani, e të gjithë shqiptarëve.

Rama deklaroi se vetëm në javën  e tretë të muajit Prill, do të mund të shohim “dritë në fund të tunelit”.

“Hapja do të vijë pas rënies së kurbës së pikut.  Ka një moment që duhet pritur kur ajo kurbë arrin pikun dhe kur ka tendencë zbritëse konstante atëherë mund të fillohet të hapemi pak nga pak. Besoj që prilli do jetë vendimtar në çdo aspekt për ne. Nëse shqiptarët do jenë kaq bashkëpunues dhe po kaq respektues të rregullave ne mund të shohim dritë në fund të tunelit në fund të prillit”, tha Rama./abcnews.al

LAdi.png
nev ila22:08 | 31/03/2020

Mjeku i njohur Pëllumb Pipero ka bërë sot me dije se një prej mjekëve është doktor Dhimitër Kraja. Sipas Piperos, Kraja është i shtruar në Spitalin Infektiv dhe ka simptoma të lehta.

“Mjek po, është profesor Dhimitër Kraja që është i prekur dhe është shtruar në Infektiv, por me sipmotma të lehta. Ai u kthye në punë dhe tashmë është infektuar, por që ka simptoma të lehta, me sa di unë”deklaroi Pipero në media.

Po kush është profesor Kraja? Ai nga të gjithë njihet si Doktor Luli dhe ishte kthyer në mjekësi për të ndihmuar kolegët kundër COVID-19. Ai prej vitesh ishte në pension, por u rikthye në punë për të vijuar misionin e tij si mjek.

Prof. Dhimitër Kraja i është përgjigjur thirrjes së Ministrisë së Shëndetësisë në luftën ndaj COVID 19. Në fakt lajmin e  bëri të ditur Ministrja e Shëndetësisë Ogerta Manastirliu përmes një postimi në facebook.

“Prof. Dhimitër Kraja ka një jetë që shërben në spitalin Infektiv, Dr. Luli, siç e thërrasin të gjithë, pas 48 vitesh punë, është përgjigjur i pari thirrjes për t’u kthyer në shërbim, për të ndihmuar stafin e palodhur të Infektivit në këto ditë të vështira”, njoftoi ministrja./abcnews.al

provokacija-nano-rama-1280x628.gif
nev ila21:57 | 31/03/2020

Mbrëmjen e sotme kryeministri Edi Rama, ka qenë në një lidhje me skype për ABC News, në “Provokacija” me gazetarin Mustafa Nano.

Gjatë bisedës me Nanon, kryeministri Rama tha se nuk ka bërë testim për koronavirusin pasi nuk e ka parë të nevojshme dhe të arsyeshme për t’iu nënshtruar këtij lloj testi nëse nuk ka simptoma.

Sipas Kryeministrit masat drastike që ka ndërmarrë në izolimin e qytetarëve do të mund të frenojnë përhapjen e koronavirusit dhe do të mund të shmangin katastrofën.

Rama gjithashtu tha se 60 % e popullsisë do të preket nga koronavirusi pasi kjo është e pashmangshme por që do të shfaqet me simptoma të lehta për disa duke bërë që ata që do të preken të imunizohen nga Covid-19.

Biseda ne studio:

Mustafa Nano: Mendoj se jeni kryeministri më i pafat i Shqipërisë, kam parasysh që ndodhi tërmeti pastaj kriza e koronavirusit.

Edi Rama: Gjyshja ime thoshte zoti zgjedh shpatullat mbi të cilat vendos gjërat e rënda. Është situatë e jashtëzakonshme. Nuk e ekzagjeroj nëse prapë do përsëris atë që kam thënë më shumë se 1 herë. Kur hap sytë në mëngjes më kujtohet e para gjë fjala e Lindon Johnson kur iu desh të dilte përpara popullit amerikan për ti dhënë lajmin e vrasjes së John Kenedit ku tha: do jepja me kënaqësi gjithçka që kam për të mos qenë unë këtu përpara jush! Mirëpo kjo është një barrë për t’u mbajtur dhe do çuar deri në fund.

Mustafa Nano: Unë mendoj se ju në rrethana emergjence dhe krizash duket sikur jepni më të mirën tuaj..

Edi Rama: Mbase sepse në këto rrethana edhe vëmendja në atë që unë bëj është më e madhe dhe mbase ndaj duket më e qartë vlera ime.

Mustafa Nano: Për tu kthyer të kriza aktuale, unë pata një testim në familjen time. Dikush kishte temperaturë dhe u detyrova që edhe unë të bëj testin për të cilin rezultova negativ. Po ju  keni bërë ndonjë testim?

Edi Rama: Jo. Mendoj se nuk duhet të testohet kush nuk ka simptoma, por gjithkush duhet të sillet njësoj sikur e ka koronavirusin. Që do të thotë se duke u testuar nuk është se ndryshon diçka.

Mustafa Nano: Rasti i Boris Johnson tregon që edhe kryeministrat e vendeve të mëdha mund të infektohen

Edi Rama: Shumica e kanë bërë…

Mustafa Nano: Për ta filluar me lajmin më të fundit në botën shqiptare. Sot në mëngjes doli informacioni zyrtar ku u njoftua se numri i të infektuarve është shtuar me 20 të tjerë, ndërkohë u tha se janë testuar më shumë se zakonisht. Kam frikë se sa më shumë të testohen aq më shumë do dalin, ju keni ndonjë ide sa mund të jetë numri i të infektuarve?

Edi Rama: Nuk kam një ide të tillë, por di që 60 % e njerëzve do ta marrin ose e kanë marrë. Virusi nuk ndalet virusi do bëj të vetën. Ajo që është e rëndësishme është që ne duhet ta ngadalësojmë përhapjen e tij dhe aspekti tjetër është që, duke e marrë virusin shumica dërrmuese faktikisht nuk ndjen asgjë dhe imunizohet. Nuk e di sa janë por di që patjetër që ka më shumë që e kanë se sa ata që janë të testuar. Ata që testohen janë njerëz që kanë simptoma përtej një kolle të thjeshtë apo një temperature të lehtë. Nëse ne do vazhdojmë të rezistojmë së pari do shmangim katastrofën dhe së dyti do fillojmë të mendojmë për lirimin e masave më shpejt se vendet e tjera.

Mustafa Nano:  E keni menduar ndonjëherë se s’mund të shmangim dot katastrofën?

Edi Rama: Pikërisht se e kam menduar kam insistuar me shumë forcë të vendosen masat shumë shpejt. Kemi qenë të parët që kemi marrë masa drastike duke parë që jemi të dobët. Ideja e katastrofës më ka qëndruar mbi kokë gjithë kohës. Një katastrofë do të thotë mijëra të vdekur.

Ne nuk kemi luksin të numërojmë mijëra të vdekur dhe për më tepër të kemi një kolaps të sistemit shëndetësor ndaj dhe po bëjmë shtrëngime të mëdha pikërisht se katastrofa duhet ta shmangim me çdo kusht./abcnews.al

 

 

nano-1.jpg
in a21:53 | 31/03/2020

Në monologun e tij këtë mbrëmje në “Provokacija”, Mustafa Nano është ndalur tek situata e krijuar nga koronavirusi në vend.

“Kam 20 ditë që rri në shtëpi dhe sot dola dhe rifillojmë me “Provokacija”.

Gjatë këtyre 20 ditëve më është kërkuar, ashtu siç i është kërkuar të gjithë shqiptarëve të bëhemi trima në këtë luftë. Në këtë luftë mund të jemi trima vetëm në një mënyrë, duke qëndruar në shtëpi dhe duke bërë një jetë sa më pak sociale.

Unë e kam bërë dhe do të përpiqem ta bëj. Është një përvojë e re, një përvojë e jashtëzakonshme, dramatike, por njëkohësisht edhe e  gëzueshme.

E gëzueshme, përveç faktit që kemi pasur mundësi të qëndrojmë me njerëzit tanë në shtëpi, kam parasysh edhe faktin që kemi pasur mundësinë të argëtohemi me video, komente të bërë në rrjete sociale. Shpeshherë këto ja kemi përcjellë njëri-tjetrit, që humorin tonë ta ndajmë edhe me miqtë tanë. Këto kohë ka pasur reagime kombesh, por edhe politikanësh dhe kanë qenë reagime interesante.

Donald Trump kohët e fundit sa herë që del në konferenca për shtyp, del bashkë me Task-Forcën e tij. Gjithmonë i referohet koronavirusit si “virusi kinez”. Duke sikur del në konferenca për shtyp vetëm për të thënë këtë gjë: “virusi kinez”. Trump vazhdon të mbetet i prapë dhe i lezeçëm.

Një reagim i një politikani tjetër është ai i Boris Johnson. Tre javë më parë, vizitoi një pavion ku kishte të shtruar njerëz të infektuar me koronavirus. Pasi doli nga pavioni tha përpara gazetarëve me mburrje: “I kam dhënë dorën çdo pacienti me koronavirus”. Ku është sot Boris Johnson? Është i sëmurë më koronavirus. Një udhëheqës i tillë nuk të inkurajon shumë, në këtë rast ka gabuar.

Më ka bërë përshtypje një gjë: në momentin që lindi frika, njerëzit fillimisht pushtuan supermarketet. Pashë britanikët që i mbushnin karrocat me letër higjienike. Ishte një skenë e pabesueshme . Britanikët e konsideronin letrën higjenike një gjë esenciale edhe në rrethanët e luftës. Unë nuk jam fare britanik, do të bëja edhe pa letër higjienike.

Një reagim tjetër ishte edhe i këngëtares së famshme,  Madona, e cila postoi në rrjete sociale një video me mesazh sensibilizues. Ajo ishte në dush, në vaskë të mbushur me qumësht dhe ishte e rrethuar me qirinj të ndezur. Aty, ajo lëshoi mesazhin: “Njerëz, koronavirusi nuk kursen askënd. Nuk do t’ja dijë as për famë as për pasuri dhe as për pushtet”.

Një reagim tjetër është i Vittorio Sgarbi i cili filmoi veten në shtëpinë e tij dhe po sulmonte ata që po dramatizonin situatën e krijuar nga koronavirusi.

Sipas tij ata po turpëronin kombin italian përpara botës dhe sipas tij ishte vetëm një grip. Por, më pas ai kërkoi ndjesë për këtë figurë të turpshme që bëri.

Histori të tilla ka pasur shumë. Këto ishin një pjesë e vogël e asaj që unë do ta quaja, gallata e koronavirusit”./abcnews.al

endri.jpg
in a20:55 | 31/03/2020

Në një lidhje me “ABC News”, sekretari i përgjithshëm i Bashkimit të Prodhuesve Shqiptar, Arben Shkodra theksoi se është e rëndësishme që të zgjidhen problemet e rëndësishme ekonomike. Shkodra tha se qeveria duhet të marrë masa të jashtëzakonshme pasi vendi do ta ketë të vështirë të rimarrë veten.

“Kemi pasur një diskutim me të gjithë anëtarët për masat konkrete të kësaj dinamike. Mendojmë që duhet të zgjidhim problemet imediatë të ekonomisë.

Sot flasim për një recesion ekonomik i cili do të dojë shumë vite të rimarrë veten. Kemi paraqitur për herë të dytë një paketë propozimesh me masat që duhet të marrë qeveria në lidhje me ekonominë prodhuese”, u shpreh Shkodra.

Gjithashtu ai theksoi se industria fasone tashmë po ngadalëson deri në mbyllje, ndërsa sipas tij industria ushqimore vijon të ketë një trend mesatar të shitjes. Më tej ai u shpreh se qeveria mori përsipër të mbulonte një fashë e cila ishte mikrobiznes.

“Sot që flasim nuk kemi një mekanizëm të shkruar që sqaron se si do të funksionojë procesi. Masa të jashtëzakonshme do të thotë dil nga instrumentet e mëparshëm klasik. Sot ku do ti gjejë lekët qeveria? Sot, i ka të gjitha instrumentet, mjafton të shohë modelet që po aplikojnë vendet e tjera.

Ose duhet të ndërhyjmë tani dhe nuk e lemë situatën të kolapsojë ose ndërhyjmë në fund dhe do të shpëtojmë vetëm disa thërrime”, u shpreh ai.

Më tej ai theksoi se i gjithë dokumenti si synim paraprak ka ruajtjen e vendeve të punës dhe qëllimi i dytë është që sipërmarrësit ti garantohet likuiditeti./abcnews.al

US-State-Department-1280x853.jpg
Sid Orela20:21 | 31/03/2020

Departamenti amerikan i Shtetit ka konfirmuar vdekjen e zyrtarit të parë nga koronavirusi. Lajmin e ka konfirmuar Sekretari i Shtetit Mike Pompeo gjatë një konference për shtyp.

Pompeo u shpreh:

Një zyrtar i Departamentit të Shtetit ka ndërruar jetë si rezultat i këtij virusi [korona].  Kemi gjithashtu anëtarë të tjerë të ekipit që janë sëmurur me COVID-19. Mendoj se jemi tani deri në katër ose pesë duzinë njerëzish që kanë rezultuar pozitivë brenda Departamentit të Shtetit, që përfshin stafin tonë të punësuar në vend, ekipin e plotë të Departamentit të Shtetit.”

Pomepo nuk dha detaje të më tejshme sa i përket zyrtarit që ka ndërruar jetë.

Nga ana tjetër, Pentagoni konfirmoi të hënën se një anëtar i shërbimit amerikan që rezultoi  pozitiv për koronavirus ka humbur jetën.

ra-1.jpg
in a20:20 | 31/03/2020

Kryeministri Edi Rama në komunikimin e përditshëm me qytetarët ka njoftuar çështjet e zgjidhura që kryesisht lidhen me pensionet, asistimet, ilaçet, operacionet mjekësore, autorizimet etj.

Gjithashu kryeministri u shpreh se “Qytetarët që nuk do të paraqiten në komision do të vijojnë që të marrin pagesat e paaftësisë, pasi komisionet janë mbyllur”.

Kryeministri Rama pas komunikimit për çështjet e zgjidhura ka telefonuar qytetarët për tu njohur me ankesat e tyre.

Biseda:

Edi Rama: Si je?

Qytetari: Të paftë i madh Zoti, dëgjon nënën tani. Kam vajzën e ndarë me dy fëmijë. Në Vlorë janë. Qiramarrësi e ka të shoqen me tumor dhe do ta shesi shtëpinë

Edi Rama: Merri emrin e pronarit dhe do të të marrim ne prapë në telefon

Qytetari: Mirë, se ne po rrimë brenda, dy pleq jemi. Ashtu siç na ke thënë ti.

Edi Rama: Ashtu bëni, mos dilni jashtë. Të fala të dashurit.

me-2.jpg
in a20:12 | 31/03/2020

Pensionistët në Thumanë kanë dalë në rrugica, me shpresën se dikush do ju sjellë ndihma ushqimore. Ata thonë se disa ushqime janë shpërndarë natën, vetëm tek disa prej banorëve të lagjes.

Pensionistët e Thumanës po vuajnë dyfish, të goditur nga tërmeti dhe nga virusi. Ata i thanë “ABC News” se nuk ju ka çuar njeri ushqime në shtëpi, dhe akuzojnë se ndihmat janë ndarë me njohje. Bashkia e Krujës ka reaguar duke thënë se ndihma vazhdon dhe fillimisht janë ndihmuar ata që janë më në nevojë.

“Ndihma ka sjellë Kisha dhe askush tjetër. Nuk kemi parë ndihma nga askush tjetër”, shprehet një e moshuar.

“Nuk kam marrë as ushqime dhe asnjë lloj ndihme nga komuna e Thumanës. Me dridhen duart dhe nuk gatuaj dot.”, thotë një tjetër e moshuar.

Akuzave për dhënie ndihmash përmes njohjeve dhe jo një lloj për të gjithë, ju bashkohet dhe këta dy pensionistë.

“Jetoj me bagëti, jemi dy pleq dhe nuk kam gatuar asgjë. Nëse të gënjej më vraftë Zoti”, thonë dy pensionistët.

“Edi Rama ka thënë se ndihmat duhet dërguar në shtëpi, ai nuk e di a dërgojnë apo jo ndihma këtu. Ata të bashkisë ndihmat i ndajnë sipas qejfit të tyre”, thotë një i moshuar.

Bashkia e Krujës, e pyetur për këtë çështje nga “ABC News”, tha se “fillimisht janë mbështetur familjet në ndihmë ekonomike, aftësi të kufizuara, pensionistët e vetmuar dhe pa përkrahje, familjet që jetojnë në çadra! Këto janë kategoritë e para përfituese nga paketa e ndihmave!

Duhet të theksojme se mbështetja e familjeve në nevoje vijon akoma, është një proçes pune i përditshëm dhe do vijojë tek familjet që realisht janë në nevoje!”

Bashkia Krujë raporton se deri më tani, janë shpërndare 900 pako ushqimore./abcnews.al

 

vit-1280x758.jpg
in a19:54 | 31/03/2020

Kishte 16 ditë në terapi intensive në infektivin e Tiranës, por nuk mundi të mbijetojë. 77 vjeçari nga Kavaja mbylli sytë i vetëm mbrëmjen e së martës.

Ministria e Shëndetësisë bëri me dije se pacienti ndërroi jetë në mënyrë të papritur nga një infarkt miokardi. Përveç koronavirusit 77-vjeçari vuante nga disa sëmundje të tjera kronike.

Ndërkohë gazetari Leonidha Musaj tha për abcnews.al se 77-vjeçari është nga Komuna e Synej në Kavajë dhe ka humbur jetën në Spitalin e Infektivit.

“77-vjeçari është dërguar në Tiranë në datën 16 të këtij muaji, ai ka një histori udhëtimi në Itali.

Fillimisht ka kryer në vizitë në spitalin e qytetit të Kavajës dhe më pas është dërguar në Durrës. Në momentin që ka kryer testin për COVID-19 ka rezultuar pozitiv dhe është dërguar menjëherë në spitalin e Infektivit në Tiranë”, raportoi gazetari.

Gjatë kohës që ka qenë i karantinuar ka shfaqur probleme shëndetësore.

Ndërkohë familjarët pasi morën përgjigjen për infektimin e 77 vjeçarit u karantinuan. Pas bërjes së testit asnjëri prej tyre nuk rezultoi i prekur.

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono