Sulmuesi i Brescias, Mario Balotelli, vazhdon të jetë një lojtar i lirë. Italiani që nga rikthimi i Seria A nga pandemia e Coronavirusit u përjashtua nga klubi italian për shkak të disa mosmarrëveshjeve. Tashmë ai është lënë jashtë listës së pagesëve dhe është në kërkim të një klubi të ri.
Sipas raportimit të ‘’Sky Sport Italia’’, është ekipi i Comos ai që ka shfaqur interes për shërbimet e Super Marios. Klubi që e mbylli sezonin në vendin e 13 të Serie C ka plane afatgjata për të ardhmen, pasi në krye janë pronarë të rinj nga Indonezia.
Balotelli ka mbetur pa stërvitje këto kohë dhe ishte klubi i Brescias që njoftoi një javë më parë se sulmuesi i Italisë është plot 8 kile mbipeshë. 29-vjeçari është aktivizuar në 19 ndeshje për Brescian në këtë sezon të Seria A, ku e ka gjetur pesë herë rrugën e rrjetës. /abcnews.al
