Kalendari në Superiore është i ngjeshur dhe Tirana zhvillon nesër në shtëpi (17:00) ndeshjen e radhës. Bardheblutë, që kryesojnë me 6 pikë më shumë se Kukësi ndjekës, janë të karikuar në maksimum dhe duan të reagojnë pas humbjes në Durrës kundër Teutës.
Përballë do të jetë Vllaznia, rival kundër të cilit Tirana ka fituar dy herë (jashtë fushe) dhe ka barazuar sfidën e parë shtëpiake këtë sezon. Emmanuel Egbo është shfaqur i qetë në konferencën për shtyp, aty ku flet rreth gjendjes së djemve të tij dhe si duhet përballuar dueli me ekipin shkodran.
NDESHJA – “Çdo ndeshje është si finale për ne dhe do futemi në fushë për të marrë maksimumin. Mund ta marrim si mësim takimin me Teutën. Nëse më parë ishim 100% gati, tani duhet të jemi 200% gati. Nuk jemi aspak në presion, jemi të qetë”.
REAGIMI – “Do jemi të shqetësuar nëse futemi në fushë dhe nuk japim maksimumin. Nëse futemi në fushë dhe japim maksimumin, Zoti do na shpërblejë. Pas koronavirusit iu kam thënë çunave se të gjitha ndeshjet do jenë si finale, nuk ka ndeshje të lehta as të vështira”.
VLLAZNIA – “Ne nuk e dimë se si do luajë kundërshtari. Teuta nuk luajti prapa por të shikojmë nesër. Çdo ndeshje ka specifikën e saj”.
ANGLEZI – “Ngo’o ka dhënë më shumë asiste se të gjithë në skuadër, por ai duhet të vazhdojë të bëjë më mirë. Është gjithçka shumë në rregull me të dhe nuk kemi probleme”. /abcnews.al
