kategoria superiore

DOSTI-PER-PARTIZANIN-ABCM5T1.mpg_snapshot_00.51-1280x720.jpg
Igli Nikolli19:20 | 02/04/2020

Partizani i këtij sezoni i ka zhgënjyer shumë tifozët. Të mbrosh titullin është gjithnjë më e vështirë sesa ta fitosh atë, por “Demat” ka shfaqur probleme të shumta. Edmond Dosti flet gjithmonë hapur dhe kritikon atë që nuk i pëlqen.

Ish-sulmuesi i njohur i Partizanit, fituesi i titullit kampion në vitin 1993, sezon ku u shpall edhe golashënuesi më i mirë i kampionatit, ka një thirrje për drejtuesit. Ai mendon se duhen shtuar orët e stërvitjes dhe punës së skuadrës, pasi lojtarët fillojnë e fiken në fundin e pjesës së parë.

Në këtë kohë mbyllje, era e gatimit më kujtoi rininë. Atëherë, kur në klubin Partizani shkonim dhe hanim në mensën e klubit. Kuptohet, jo vetëm ne. Çdo klub kishte mensën e vet. Hanim, e prapë donim të hanim? Ja u them unë! Donim përsëri, sepse stërviteshim katër orë në ditë. Bënim pasime, vrap, gjuajtje pa fund drejt portës. Po sot sa orë stërvitje bëjnë lojtarët e Partizanit?

Megjithëse ka vite që Presidenti Demi ka përgatitës fizikë, shikoj që lojtarëve “u mbaron benzina” që në minutën e 40-të të ndeshjes. Ka disa që futen pa benzinë fare. Thuhet për disa, që kanë talent. Kanë, e vërtetë. Por, me dy orë stërvitje në ditë, 10 herë u bie të gjuajnë topin.

Si mund të përmirësohet talenti kur nuk gjuan në stërvitje dhjetra herë drejt portës? Brezi ynë të kishte kushtet e këtyre tani, kushedi ku do arrinte. I nderuar Olsi, rrit orët e stërvitjes nëse do rezultate, e nëse dëshiron që të shesësh lojtarë, e të nxjerrësh rentabël ndërrmarjen. PMTP”, përfundon Edmond Dosti. /abcnews.al

hidi.jpg
Vladimir Prenga17:29 | 02/04/2020

Isli Hidi ka prekur disa tema gjatë prononcimit të tij për “Fan Zone” në Supersport. Portieri i Bylis tregon trajnerin më të mirë me të cilin ka punuar te kombëtarja shqiptare (numëron 17 ndeshje të zhvilluara), sezonin e skuadrës ballshiote dhe të ardhmen.

Trajneri më i mirë në kombetare? Kam punuar me Brigel, Oto Baric dhe Josip Kuzhe. Nuk i ndaj dot, pasi kanë pasur skemat e veta. Për mendimin tim Brigel. Pezullimi i kampionatit? Situata ishte e tillë dhe po prisnim ndeshjen me Tiranën. Pastaj u vendos që nuk lëviznim dot dhe qëndruam në Ballsh dy ditë.

Në shtëpi nuk mund të bësh shumë stërvitje. Është shumë larg me stërvitjen në fushë. Do jetë problem për të gjithë. Do na jepet kohë të bëjmë një minifaze, pasi ka shumë që nuk luajmë. Nuk mund të them që jam golashenues. Doja të provoja të shënoja tani në fund të karrierës. Ndjesia është më e mirë kur shpëton skuadrën se sa kur shënon.

Çdo sportist ka dëshirë të luajë sa më shumë. Fundi i karrierës është edhe më i vështirë. Kur ndihesh mirë, edhe luan. Tani ndjehem mirë dhe të shohim në vazhdim“, deklaron 39-vjeçari. /abcnews.al

Doka.png
Igli Nikolli14:57 | 02/04/2020

Sot ka qenë një ditë gëzimi për Albi Dokën. Motra e tij e vogël, Mikah feston ditëlindjen dhe familja ka zhvilluar një festë të bukur. Argëtimi dhe lojërat nuk kanë munguar.

Lojtari i Tiranës ka postuar një video në rrjetet sociale dhe aty shfaqet duke garuar me disa nga njerëzit të tij. Sprint nga karrigia drejt vendit ku janë tollumbacet dhe rikthim me shpejtësi përsëri në karrike, duke u ulur sipër tyre dhe duke i plasur.

Kush e bën më shpejt fiton, Doka ka treguar se mbetet i shpejtë edhe pa stërvitje, teksa kjo lojë ka shkaktuar ilaritet të madh, duke e shtuar në maksimum dozën e festës së ditëlindjes. /abcnews.al

Egbo-Tirana-3-e1580325195539.jpg
Igli Nikolli14:55 | 01/04/2020

Emmanuel Egbo mori drejtimin e Tiranës në 28 dhjetorin e vitit të kaluar dhe pak besonin tek ai në ato momente. Nigeriani uli kokën, punoi fort dhe skuadra e tij filloi të xhirojë. Më në fund u thye tersi në derbi ndaj Partizanit dhe Tirana nuk u ndal më.

Kampionati është pezulluar prek koronavirusit, por djemtë e tij nuk kanë pësuar asnjë humbje dhe kryesojnë Superioren me 9 pikë më shumë se Kukësi ndjekës. 46-vjeçari po qëndron në shtëpi me familjen e tij gjatë kësaj kohe.

Një person që ka kaluar gjithë jetën me sport e ka të vështirë të qëndrojë pa stërvitje. Trajneri afrikan ka postuar një video ku shihet duke kryer disa ushtrime gjimnastikore. Ai shpreson që kampionati të rifillojë dhe t’i rikthehet punës së përditshme me djemtë e tij. /abcnews.al

 

View this post on Instagram

 

A post shared by Emmanuel Egbo (@emmaegbo) on

Vllaznia-e1585323017129.png
Igli Nikolli14:54 | 30/03/2020

Vjen edhe reagimi i Vllaznisë. Klubet shqiptare po kërkojnë ndihmë nga shteti shqiptar për të përballuar krizën e shkaktuar nga koronavirusi. Bylis dhe Laçi i kërkuan qeverisë të ndihmojnë futbollin shqiptar, duke marrë shembullin e Kosovës, aty ku Ministria e Sporteve ka akorduar një fond prej 5 milion eurosh.

Klubi shkodran thekson se vështirësitë për të shlyer detyrimet financiare mujore janë të mëdha dhe kjo situatë është shkatërruese për sportin dhe futbollin. Kuqeblutë kërkojnë ndihmë nga qeveria, që ftohet të marrë shembullin e Kosovës dhe shteteve të tjera.

Prej tre javësh vendi ynë ndodhet në një situatë të pazakontë, e ardhur kjo nga pandemia që e ka pushtuar atë dhe mbarë Botën. Në kushte të tilla kuptohet që askush nuk e ka mendjen tek sporti, por në rradhë të parë tek rikthimi i normalitetit të jetës. Por nga ana tjetër, duhet të mendojmë edhe për vazhdimësinë, por konstatojmë se pasojat e kësaj ndërprerje do të jenë të mëdha.

Ashtu si në mbarë botën sportive, edhe tek ne një gjë e tillë ka filluar të ndihet dhe sidomos tek klubet e futbolli, përfshi këtu edhe KF Vllazninë. Edhe për ne, është shumë e vështirë që të likujdohen detyrimet financiare mujor, sigurimet shoqërore, tatimi në burim dhe tatimi mbi fitimin, të cilat janë shifra jo të pakta në vlera.

Nga ana tjetër, futbollistët kanë filluar me të drejtë të kërkojnë rrogat sepse duan të mbajnë familjet e tyre ngaqë e kanë atë mjetin e vetëm të të ardhurave. Në këto kushte, jemi të bindur se futbolli ka nevojë për mbështetjen e shtetit. Qeveria duhet të garantojë që futbolli të mos dalë tërësisht i dëmtuar nga kjo situatë. Dëmi që po shkaktohet nga ndalimi i çdo eventi, grumbullimi dhe stërvitje, është shkatërrues për sportin.

Kosova dhe vende të tjera kanë marrë ndërkohë masat për mbështetjen e sportit dhe besojmë se këtë gjë duhet ta bëjë edhe Qeveria jonë. Mbetemi me shpresën që kjo kërkesë e jona të merret parasysh duke shpresuar në normalizimin sa më të shpejtë të situatës dhe rikthimin e normalitetit në jetën e shqiptarëve por njëkohësisht edhe në sport“, lexohet në deklaratën e Vllaznisë. /abcnews.al

Kap-e1585502777199.png
Igli Nikolli19:35 | 29/03/2020

Koronavirusi ka shkaktuar një krizë të madhe ekonomike dhe klubet e brishta shqiptare janë prekur nga kjo situatë e pazakontë. Klubi i Bylis ka reaguar me anë të një postimi në faqen zyrtare.

Presidenti i skuadrës ballshiote, Besnik Kapllanaj fton Qeverinë dhe Ministrinë e Arsimit dhe Sportit, që të ndihmojë ekonomikisht klubet shqiptare. Shembulli vjen nga Kosova, aty ku Ministria e Sporteve ka dhënë një fond prej 5 milion eurosh për sportin.

Shqipëria është në karantinë dhe qysh prej 12 marsit 2020, futbolli dhe gjithë aktivitetet e tjera sportive janë ndalur. Nuk dihet se kur do të rikthehet aktiviteti normal. Ndërsa klubet dhe presidentët e vuajnë shumë, ndonëse edhe bizneset e tyre tashmë janë të pezulluara, pasi duhet që të paguajnë stafet, që përfshijnë trajnerët apo dhe lojtarët e burimet njerëzore sipas kontratave që kanë nënshkruar, pa harruar edhe grumbullimet, pasi në radhët e skuadrave tona ka shumë lojtarë të huaj.

Presidenti i Bylisit, Besnik Kapllanaj në një deklaratë për mediat analizon situatën e jashtëzakonshme dhe mjaft të vështirë në të cilën ndodhet vendi ynë, ndërsa kërkon që Qeveria të ndihmojë futbollin në këtë moment: “Edhe pse vendi është në një situatë të paprecedentë, mendoj se ka ardhur momenti që Shteti Shqiptar dhe sidomos Ministria e Sportve të ndihmojnë sportin duke ndjekur shembullin e Kosovës. Jo më larg se sot kemi mësuar se, Ministria e Sportit në Kosovë dha një fond prej 5 milion eurosh për sportin, që është me të vërtetë tejet pozitiv.

Imagjinoni, nëse jepet një fond i atillë edhe në Shqipëri të paktën për këtë periudhë krize, besoj se do të jetë shumë pozitive dhe një shtysë shumë e madhe për klubet tona, në mënyrë që të mos cënohemi edhe më shumë në xhepat tanë. Kështu edhe sponsorët, duke qenë se aktiviteti nuk vijon shohin si rrugë të vetme largimin. Ndërkohë që edhe lojtarët me të drejtë kërkojnë pagat mujore sipas kontratës, sepse ne shumicën i kemi familjarë.

Në një situatë të atillë, që unë shpresoj që të kalojë sa më shpejt dhe me sa më pak pasoja, klubet kërkojnë që të përfshihen edhe ato në buxhetin e ndihmës që po jep Qeveria shqiptare, në mënyrë që aktiviteti i tyre të mos cënohet dhe futbolli që është i vetmi mjet argëtimi dhe sporti më i vjetër dhe më popullor që ka më shumë interes në vendin tonë të vijojë të mbahet në këmbë, e pse jo për ta çuar edhe më lartë”, – tha presidenti i ballshiotëve, Besnik Kapllanaj“, lexohet në komunikatën e klubit të Superiores. /abcnews.al

Cale.png
Igli Nikolli19:16 | 29/03/2020

Elton Cale është një tip gazmor, njësoj si të gjithë futbollistët brazilianë. 31-vjeçari i Tiranës po qëndron i izoluar në shtëpi bashkë me gruan dhe vajzën e tij. Humori dhe kreativiti nuk i mungonë dhe e kanë ndihmuar të kalojë këto ditë të vështira.

24 herë kampionët e Tiranës, duke llogaritur që sivjet festojnë 100-vjetorin e krijimit të klubit, kanë nisur një sondazh në “Instagram”. Tifozët do të zgjedhin lojtarin bardheblu më të mirë të shekullit dhe klubi do t’i dhurojë një çmim në festën e madhe.

Votimet do të zgjasin një javë dhe aty ka marrë pjesë edhe Cale. “Agustin Torassa”, është përgjigjur lojtari ofensiv, duke votuar koleguan e tij argjentinas. Sigurisht një shaka e Cale, por edhe një vlerësim për Torassa, të cilin e ka edhe një nga miqtë më të mirë. /abcnews.al

 

bATHA-1-e1585419879284.png
Igli Nikolli19:36 | 28/03/2020

Idriz Batha feston sot 27-vjetorin e lindjes. Mesfushori po zhvillonte një super sezon deri në momentin që kampionati u ndërpre nga përhapja e koronavirusit. Urimet për të kanë qenë të shumta, teksa I veçantë është ai i Tefik Osmanit.

Ça të thotë menaxheri ty, ti këndon vetë”, shkruan korçari në videon ku Batha shfaqet duke kënduar “Gëzuar ditëlindjen” në anglisht. Qendërmbrojtësi ka postuar edhe një foto gjatë kohës që ishte pjesë e Skënderbeut.

Aty shfaqet edhe ish-arbitri, Lorenc Jemini. “Eh mor Osman sa i urtë ke qenë”, shkruan Jemini në formë batute me Tefik Osmanin. /abcnews.al

 

Kukesi-1-e1585342024438.png
Igli Nikolli22:15 | 27/03/2020

Punimet në stadiumin e Kukësit vazhdojnë, por jo me të njëjtin ritëm. Koronavirusi ka bërë efektin e vet dhe intensiteti i punës ka rënë. Klubi verilindor ka publikuar foto të asja që po ndodh në stadiumin e ri.

“Punimet në stadiumin e ri të Kukësit vijojnë, megjithëse me ritme më të ngadalta. Po punohet me orare te shkurtuara dhe staf të reduktuar duke respektuar njëkohësisht edhe rregullat për sigurinë në kuadër të masave në luftën kundër COVID-19”, lexohet në postimin e bërë në faqen zyrtare.

Skuadra kuksian ka vuajtur shumë këtë sezon. Ajo është detyruar të “migrojë” në stadiume të ndryshme dhe e ka ndjerë shumë mbështetjen e tifozerisë së saj të zjarrtë. /abcnews.al

edi-martini.jpg
Veronik Istrefaj17:34 | 27/03/2020

Edi Martini ka qenë një sulmues fantastik, teksa provoi të luante edhe në Bundesligë me Eintracht Frankfurt. Shkodrani sot mban postin e trajnerit të Teutës dhe prek disa tema gjatë prononcimit në emisionin “Fan Zone” në Supersport.

KARANTINA – “E vështirë të qëndroj në shtëpi, por mundohem ta mbaj veten me të mira. Luaj basketboll ose ping-pong në shtëpi. Objektivi i Teutës është Europa dhe shpresoj t’ia dalim deri në fund”.

EINTRACHT – “Ëndrrat që kisha te Vllaznia kur isha i vogël, po më realizoheshin që në fillim dhe kjo ndoshta ndikoi keq. Deri në ‘97 isha pjesë e Vllaznisë, pastaj më kërkoi Frankfurti. Kalova aty, por gjithçka është çështje fati. Nga Shqipëria shkova 3-4 muaj pa stërvitje, deri sa e kapa formën, pastaj u dëmtova, futbolli është i lidhur me fatin dhe nuk ke çfarë bën”.

TEUTA – “Çunat stërviten dy nga dy, siç ndodh në shumë vende të Europës. Është një metodë që po përdoret shumë. Nëpërmjet internetit unë i shikoj se çfarë ndodh. Dje unë shkova dhe i pashë nga afër. Jemi në një situatë të vështirë, ku nuk e dimë se kur do të nisë kampionati. Kryesorja është që çunat të mos humbin kondicionin fizik, pasi për taktikat do të punojmë më vonë”.

OBJEKTIVAT – “Jemi me objektiva dhe nuk do të më vinte mirë nëse kampionati do të mbyllej tani. Jemi në këtë pozitë për shkak të gabimeve tona. Mendoj se duhet të ishim në vendin e dytë dhe mendoj se në fund do arrijmë aty ku meritojmë. Me keq këtë moment e kalojnë portierët dhe sulmuesit. Objektivi im është që të dal kampion edhe si trajner”, tha Martini. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono