PSG, Atalanta, Leipzig dhe Atletico Madrid janë katër skuadrat e kualifikuara në çerekfinalet e Champions League për këtë sezon. Koronavirusi bllokoi kompeticionin më të rëndësishëm për klube dhe katër ekipet e tjera të raundit të 1/4 do të mësohen pasi të rinisin duelet. Sky Sport Italia raporton se ky sezon do të përfundojë në muajin gusht.
Ndeshjet e kthimit të raundit të 1/8 do të luhen në datat 7 dhe 8 gusht. Barcelona pret Napolin në “Camp Nou” (1-1 ndeshja e parë) dhe Juventusi do të tentojë përmbysjen ndaj Lyon (francezët fituan 1-0 në shtëpi). Bayern Munchen triumfoi 0-3 në Londër përballë Chelsea dhe ndeshja e kthimit është formalitet. Në fund, dueli më spektakolar. Manchester City arriti një fitore të madhe 1-2 në “Santiago Bernabeu” ndaj Real Madrid, por djemtë e Zidane nuk janë dorëzuar akoma.
Sfidat e para të fazës çerekfinale do të zhvillohen në datat 11-12 gusht, ndërsa ato të kthimit në 14-15 gusht. Muaji i fundit i verës do të jetë i zjarrtë dhe shumë intensiv. 18-19 gushti do të dhurojë ndeshjet e para gjysmëfinale dhe 21-22 gushti do përcaktojë çiftin final, me betejën e madhe që do të luhet në Stamboll mbrëmjen e 29 gushtit. /abcnews.al
