Loading ...
Ndryshimet klimatike janë shndërruar në një “emergjencë globale shëndetësore”, pasi temperaturat në rritje, thatësirat ekstreme dhe kërcënimet e tjera të lidhura me klimën po shkaktojnë dëme gjithnjë e më të mëdha për shëndetin e njerëzve, sipas gjetjeve të një studimi të ri të publikuar në revistën Lancet.
Raporti i vitit 2026 i Lancet Countdown, i udhëhequr nga University College London në bashkëpunim me Organizatën Botërore të Shëndetësisë (OBSH), zbuloi se rreziqet klimatike për shëndetin po përshkallëzohen, pavarësisht përparimit të shënuar që nga Marrëveshja e Parisit e vitit 2015.
“Një dekadë pas Marrëveshjes së Parisit, gjetjet tona janë të qarta: dëmet që ndryshimet klimatike i shkaktojnë shëndetit po rriten më shpejt sesa reagimi i botës ndaj tyre dhe, në shumë raste, madje po përshpejtohen”, tha Marina Romanello, drejtoreshë ekzekutive e Lancet Countdown.
Studimi, në të cilin morën pjesë 146 studiues nga më shumë se 100 institucione, vlerësoi se temperaturat e larta kontribuuan në më shumë se 540.000 vdekje në vit gjatë periudhës 2016–2023, ku 68 për qind e tyre iu atribuuan ndryshimeve klimatike.
Vetëm në vitin 2023, temperaturat e larta u lidhën me rreth 710.000 vdekje, më shumë se 71 për qind e të cilave iu atribuuan ndryshimeve klimatike.
Studiuesit vlerësuan se temperaturat ekstreme shkaktuan humbje të të ardhurave të mundshme në vlerë prej më shumë se 1 trilion dollarësh në mbarë botën në vitin 2025, duke shënuar vitin e tretë radhazi që kjo shifër tejkalon këtë prag.
Studiuesit u bënë thirrje qeverive dhe institucioneve ndërkombëtare që t’u japin përparësi rreziqeve shëndetësore të lidhura me klimën, të përshpejtojnë uljen e emetimeve dhe të forcojnë bashkëpunimin global.
“Kjo nuk është një përkeqësim gradual, por një ndryshim i menjëhershëm dhe i ndjeshëm që duhet të njihet si emergjenca globale shëndetësore që është”, tha Romanello.
