Loading ...663.3 milionë euro ka blerë Banka e Shqipërisë në treg në gjysmën e parë të këtij viti.
Nga të dhënat konstatohet se kjo vlerë është pothuajse sa trefishi i shumës së blerë në të njëjtën periudhë të vitit të kaluar por më e lartë edhe nëse e krahasojmë me vitet e mëparshme.
Me blerjen e eurove , Banka e Shqipërisë synon të ndikojë në kursin e këmbimit dhe të kufizojë luhatjet e forta të tij. Megjithatë, kjo nuk do të thotë se kursi i euros do të rritet automatikisht, pasi ai ndikohet edhe nga kërkesa dhe oferta në treg.
Ndërhyrjet e bankës tregojnë se presioni nga oferta e lartë e valutës në treg mbetet i forte I ndikuar direkt nga turizmi, remitancat si dhe investimet e huaja .Aktualisht euro po këmbehet në kufitë e 92 lekëve duke pasur një rritje krahasuar me vlerën në muajt e verës ku qarkullimi I euros ka qenë më i lartë.
Blerja më e madhe e eurove është regjistruar në muajt prill dhe qershor të cilat korrespondojnë edhe me nisjen e sezonit turistik në vend. Vetëm në këto dy muaj Banka Qendrore tërhoqi nga tregu 524 milionë euro. Nga kjo shumë, 381 milionë euro u përdorën për të ndikuar në stabilizimin e kursit të këmbimit, ndërsa pjesa tjetër për rritjen e rezervës valutore të vendit.
Por çfarë do të thotë kjo për qytetarët? Kur në treg ka shumë euro, vlera e tyre kundrejt lekut mund të bjerë. Kjo ndikon drejtpërdrejt te qytetarët që marrin të ardhura në euro, por kanë shpenzime në lekë, pasi kur e këmbejnë valutën, mund të marrin më pak lekë.
Sipas Bankës së Shqipërisë, mesatarja e blerjeve për ankand arriti në 15.9 milionë euro, nga 14.3 milionë euro në tremujorin e parë dhe 13.5 milionë euro gjatë vitit 2025.
Banka e Shqipërisë sqaron se këto ndërhyrje nuk synojnë të ndikojnë drejtpërdrejt në kursin e këmbimit, por të ruajnë funksionimin normal të tregut dhe të forcojnë pozicionin financiar të vendit.
