Loading ...
Gjermania planifikon të ndërtojë një bazë të re detare në qytetin Emden, në veriperëndim të vendit, në kuadër të zgjerimit të kapaciteteve të marinës dhe përballimit të sfidave në rritje të sigurisë ndërkombëtare.
Ministri gjerman i Mbrojtjes, Boris Pistorius, mori pjesë në ceremoninë në Emden, ku zyrtarë të lartë nënshkruan një letër qëllimi për ndërtimin e bazës.
“Do të jetë një bazë e madhe detare”, deklaroi Pistorius, duke theksuar rëndësinë strategjike të vendndodhjes për shkak të aksesit të shpejtë në Detin e Veriut dhe Atlantikun e Veriut, si dhe lidhjes me aktivitetet e përbashkëta të trajnimit dhe operacioneve të NATO-s.
Baza në Emden do të jetë e pesta kryesore detare e Gjermanisë dhe pritet të lehtësojë ngarkesën mbi bazën e Wilhelmshaven, e cila aktualisht është qendra kryesore e marinës gjermane në Detin e Veriut. Megjithatë, Ministria e Mbrojtjes ka sqaruar se Wilhelmshaven do të mbetet një pikë qendrore, ndërsa Emden do ta plotësojë atë.
Pistorius tha se zgjerimi i marinës është i nevojshëm për shkak të ndryshimit të situatës së sigurisë dhe angazhimeve të Gjermanisë në kuadër të NATO-s.
“Sot kemi marinën më të vogël në historinë e Bundeswehr-it dhe në të njëjtën kohë grupin më të madh dhe më të gjerë të detyrave. Prandaj marina duhet të rritet dhe do të rritet”, tha ministri.
Sipas raportimeve të mediave, ndërtimi i bazës së re pritet të kushtojë disa miliardë euro. Ajo synon të arrijë gatishmërinë e plotë operacionale në vitin 2030 dhe mund të strehojë deri në 2 mijë pjesëtarë të personelit ushtarak dhe civil.
Sipas Pistorius, forcimi i kapaciteteve detare do të ketë rëndësi të veçantë për sigurinë në Detin Baltik, Detin e Veriut dhe Atlantikun e Veriut, duke rritur kapacitetet e Gjermanisë dhe kontributin e saj në parandalimin e NATO-s.
