Loading ...
Kina ka akuzuar agjenci të huaja të inteligjencës se po përdorin breshka deti dhe peshq të pajisur me sensorë elektronikë për të mbledhur të dhëna në ujërat pranë territorit të saj.
Në një deklaratë të publikuar nga Ministria e Sigurisë së Shtetit e Kinës, autoritetet kineze pretendojnë se kafshët detare po përdoren si platforma lëvizëse për grumbullimin e informacioneve mbi mjedisin detar, përfshirë temperaturën e ujit, nivelin e kripësisë, thellësinë dhe lëvizjen e rrymave oqeanike.
Sipas Pekinit, të dhënat e mbledhura transmetohen përmes sistemeve satelitore tek organizata ose institucione jashtë vendit. Autoritetet argumentojnë se, megjithëse këto informacione mund të duken shkencore, ato kanë vlerë të konsiderueshme strategjike dhe ushtarake.
Sipas deklaratës, të dhënat mund të përdoren për krijimin e hartave të detajuara nënujore të vijës bregdetare kineze, analizimin e karakteristikave të terrenit detar dhe identifikimin e pikave të ndjeshme të mbrojtjes bregdetare apo infrastrukturës ushtarake.
Ministria kineze paralajmëroi se teknologjitë moderne të spiunazhit po bëhen gjithnjë e më të sofistikuara dhe më të vështira për t’u zbuluar, duke përfshirë përdorimin e kafshëve detare dhe pajisjeve elektronike që mund të operojnë për periudha të gjata pa u vënë re.
Megjithatë, autoritetet kineze nuk kanë identifikuar ndonjë shtet, qeveri apo agjenci specifike si përgjegjëse për këto aktivitete të dyshuara.
Deklarata vjen në një periudhë tensionesh të vazhdueshme mes Kina dhe vendeve perëndimore lidhur me çështjet e sigurisë kombëtare, teknologjisë dhe akuzat e ndërsjella për spiunazh.
