Loading ...
E cilësojnë si punë afër fundit, ndonëse tym të bardhë nuk ka.
Mario Mitaj mund të kthehet në Europë, dhe pas Greqisë e Rusisë të provojë edhe futbollin italian.
Mbrojtësi i kombëtares shqiptare, kartonin e së cilit e ka Al Itihad në Arabinë Saudite, besohet se është në bisedime të përparuara me një klub në Serinë A, dhe mediat në Riad japin emrin e Romës.
Trajneri I verdhekuqve, Xhampiero Gasperini, pasi punoi me Berat Gjimshitin tek Atalanta, mund të ketë një tjetër shqiptar në ekipin e tij.
Vlera e kartonit të lojtarit kuqezi jepet në 5.5 milionë euro, por sipas mediave saudite oferta nga kryeqyteti italian mund të jetë më e lartë.
Gjithsesi, çështjet e parave janë më të vështirat kur vjen puna tek transferimet e futbollistëve, dhe të shohim çfarë do të ndodhë.
Mitaj luan prej dy sezonesh për Al Itihadin pikërisht në Arabinë Saudite, me të cilin vitin e kaluar fitoi titullin kampion dhe Kupën e Mbretit, ndërsa këtë herë edicioni ishte I dështuar.
Mbrojtësi I majtë 22-vjeçar ka gati 60 ndeshje për sauditët, me 2 gola e 6 asistë, me kontribut të rëndësishëm, por edhe me probleme aktivizimi për shkak të rregullave për të huajt në ligën e atij vendi.
Paga e tij jepet në 3 milionë euro, madje pa taksa, ndaj edhe një marrëveshje për rrogën në Itali nuk do të ishte e lehtë.
