Loading ...
E gjithë juria e Bienales së Venecias ka dhënë dorëheqjen vetëm nëntë ditë para fillimit të ngjarjes prestigjioze të artit, mes tensioneve në rritje për kthimin e Rusisë për herë të parë që nga fillimi i luftës në Ukrainë.
Në një deklaratë të shkurtër, juria tha se po vepronte në përputhje me vendimin e saj të mëparshëm për të mos marrë në konsideratë vendet “udhëheqësit e të cilave aktualisht akuzohen për krime kundër njerëzimit” për ndonjë çmim, që do të thotë Rusia dhe Izraeli.
Bienalja ka qenë në qendër të polemikave për javë të tëra. Njoftimi dramatik erdhi një ditë pasi një delegacion nga ministria e kulturës e Italisë vizitoi Venecian për të mbledhur informacion në lidhje me rihapjen e pavionit rus, gjë që tashmë e kishte bërë vetë ministrin të shpallte bojkotin e Bienales.
Më herët në prill, Bashkimi Europian njoftoi tërheqjen e një granti prej dy milionë eurosh për shkak të rikthimit të Rusisë në Bienale, të cilin e konsideroi “moralisht të gabuar”, pasi Moska “kërkon të fshijë kulturën ukrainase” si pjesë të pushtimit të saj.
Në vitin 2022, pasi Rusia hyri në luftë kundër Ukrainës, kuratori dhe artistët e përfshirë në pavijonin rus u tërhoqën në shenjë proteste kundër Vladimir Putinit dhe pushtimit të tij, duke e lënë pavijonin bosh. Në vitin 2024, Rusia ia dorëzoi hapësirën Bolivisë.
Nga ana tjetër Ministria e Jashtme e Izraelit më parë komentoi se vendimi për të përjashtuar vendin nga çmimet e mundshme ishte “një kontaminim i botës së artit”.
Juria në Bienale duhej të shpallte një sërë çmimesh në inaugurimin më 9 maj. Kjo ceremoni tani është anuluar dhe vizitorët do të kenë mundësi të votojnë vetë për pavionet e tyre të preferuara./abcnews.al
