Loading ...
Komisioneri Evropian për Transportin e Qëndrueshëm dhe Turizmin, Apostolos Tzitzikostas, tha të enjten se çdo kërcënim ndaj civilëve është “i papranueshëm”, duke theksuar se garantimi i sigurisë së qytetarëve mbetet prioritet në mes të raportimeve për kërcënime me bomba ndaj disa avionëve.
Në një deklaratë të publikuar në platformën sociale amerikane X, Tzitzikostas tha se Bashkimi Evropian po e monitoron nga afër situatën dhe se është në kontakt me shtetet anëtare të prekura dhe Agjencinë e Bashkimit Evropian për Sigurinë e Aviacionit (EASA).
Ai tha se është aktivizuar mekanizmi i shkëmbimit të informacionit në nivel të BE-së për sigurinë e aviacionit.
Tzitzikostas shtoi se u ka bërë thirrje autoriteteve kombëtare të bashkëpunojnë ngushtë me operatorët e aeroporteve, kompanitë ajrore dhe agjencitë e zbatimit të ligjit.
Ai theksoi se autoritetet kombëtare janë përgjegjëse për vlerësimin e kërcënimeve të sigurisë, hetimin e incidenteve dhe zbatimin e masave përkatëse të sigurisë së aviacionit.
“Është ende herët të nxirren përfundime nëse incidentet e raportuara janë të ndërlidhura. Hetimet kombëtare janë ende në vazhdim”, tha Tzitzikostas.
Të paktën 22 fluturime të pasagjerëve në mbarë Evropën janë bërë objekt i kërcënimeve të raportuara me bomba brenda katër ditësh, duke shkaktuar ulje emergjente, devijime të itinerareve, shoqërime nga avionë ushtarakë dhe kontrolle sigurie në aeroporte në disa vende.
Incidentet, të raportuara nga 2 deri më 5 nëntor, kanë prekur fluturime të kompanive ajrore Ryanair, Wizz Air, LOT Polish Airlines, SAS, Finnair, Jettime, Aer Lingus dhe Aegean Airlines, ndër të tjera.
